Sin invitaziun da la regenza grischuna ha la regenza dal Vorarlberg visità ier il chantun Grischun. A chaschun d'in discurs da lavur èn vegnids tractads tranter auter ils temas transcunfinals traffic public, tuberculosa tar ils tschiervs e protecziun cunter aua gronda.

A chaschun da sia visita dal chantun Grischun è la delegaziun dal Vorarlberg vegnida manada dal guvernatur Markus Wallner. Accumpagnà è el vegnì dal president da la regenza Karlheinz Rüdisser, da las assessuras e dals assessurs Christian Bernhard, Johannes Rauch, Katharina Wiesflecker, Barbara Schöbi-Fink, Christian Gantner sco er dal manader da l'uffizi da la regenza Günther Eberle.

Las duas delegaziuns èn sa scuntradas ier a Cazas ed han visità là la construcziun brutta da la nova praschun Cazas Tignez. Silsuenter ha gì lieu il discurs da lavur en las localitads da la clinica Beverin.

Discurs da lavur focussà sin temas transcunfinals actuals
En il discurs da lavur èn vegnids tractads ils projects da traffic "Mobil en la Val dal Rain" (S-18 via directa Lai da Constanza), "Viafier S FL.A.CH" sco er il tact d'ina ura Grischun-St.Margrethen-Bregenz-Lindau-Allgäu. Discutads èn vegnids – ultra dals temas tuberculosa tar la populaziun da tschiervs e protecziun cunter aua gronda al Rain alpin – er il parc natiral Reticon sco er la tematica turissem.

La visita da la regenza dal Vorarlberg ha servì en emprima lingia a tgirar las relaziuns amicablas ed a barattar experientschas sin ils champs da la cultura, da l'economia e da la politica. Las relaziuns cun il Vorarlberg èn tradiziunalmain impurtantas e stretgas ed èn marcadas d'ina gronda enclegientscha en blers secturs e da la buna collavuraziun tranter vischins.

Fotografias agiuntadas:

Las delegaziuns dal Grischun e dal Vorarlberg cun il guvernatur Markus Wallner e cun il president da la regenza Jon Domenic Parolini (entamez).

Guvernatur Markus Wallner e president da la regenza Jon Domenic Parolini.


Gremi: regenza
Funtauna: rg chanzlia chantunala dal Grischun