La regenza ha respundì ad in project da consultaziun da la confederaziun concernent il congedi da paternitad. Plinavant s'engascha ella per la renconuschientscha dal chaun pastur anatolais en il program naziunal per la protecziun da muntaneras.
La regenza beneventa in congedi da paternitad da duas emnas
La regenza ha prendì posiziun davart la cuntraproposta indirecta tar l'iniziativa dal pievel "Per in congedi da paternitad raschunaivel – a favur da tut la famiglia". Il project da consultaziun da la cumissiun per segirezza sociala e sanadad dal cussegl dals chantuns (CSSS-CC) prevesa in congedi da paternitad pajà da 2 emnas. Quel po vegnir retratg dal bab entaifer 6 mais suenter la naschientscha, e quai en ina giada u durant singuls dis. Gist uschia sco l'indemnisaziun en cas d'ina maternitad duai il congedi da paternitad vegnir finanzià sur l'urden da cumpensaziun.
La regenza sustegna las finamiras da l'iniziativa da la cumissiun. Ella è da l'avis che tant ils babs sco er las mammas e betg sco ultim ils uffants profiteschian d'in congedi da paternitad. Il congedi da paternitad è in ferm signal per ina repartiziun colleghiala da las rollas e per la diversitad dals models da famiglia. En l'emprima fasa suenter la naschientscha gida el a mantegnair il potenzial da forzas da lavur svizras. Sche tuts dus geniturs sa participeschan d'emprim ennà a la tgira d'uffants, senza ch'in genitur stoppia smetter sia activitad da gudogn, profitescha er l'economia grazia al mantegniment da forzas da lavur versadas. La regenza beneventa perquai la soluziun da cumpromiss d'in congedi da paternitad da 2 emnas, ch'è vegnì proponì da la maioritad da la cumissiun. Medemamain beneventa la regenza ch'il congedi da paternitad duai vegnir finanzià sur l'urden da cumpensaziun dal gudogn, analogamain a l'indemnisaziun en cas d'ina maternitad.
Documents da consultaziun da las cumissiuns parlamentaras
Chauns pasturs anatolais tutgan en il program naziunal per la protecziun da muntaneras
La regenza è sa drizzada cun ina brev a la cussegliera federala Simonetta Sommaruga. Il motiv per questa brev è la renconuschientscha dal "chaun pastur anatolais" sco razza da chauns per proteger muntaneras en il program naziunal federal per la protecziun da muntaneras da la confederaziun. Actualmain elavura la confederaziun in nov agid d'execuziun per la protecziun da muntaneras e d'avieuls. En quel designescha l'uffizi federal d'ambient (UFAM) las razzas da chauns da protecziun da muntaneras ch'èn renconuschidas en il program naziunal federal per la protecziun da muntaneras. Ord vista da la regenza ha il UFAM desistì per motivs nunchapibels d'integrar respectivamain da renconuscher il chaun pastur anatolais.
Dapi ch'ins ha cumenzà avant 10 onns cun mesiras per proteger muntaneras, collavuran plirs manaschis fitg versads stretgamain cun il chantun Grischun. Els tuts tegnan oz cun success chauns pasturs anatolais, ch'èn en acziun en il Grischun dapi l'onn 2015. Ils manaschis èn participads decisivamain al success da la protecziun da muntaneras ch'è vegnida stabilida en il Grischun, ed ensemen cun il chantun procuran els per ina communicaziun e per ina scolaziun preziusa en connex cun ils chauns da protecziun da muntaneras. La protecziun da muntaneras è s'etablida pervia dal success dals manaschis professiunals e pervia da la stretga collavuraziun tranter ils manaschis, las autoritads e la populaziun. Almain in tschintgavel dals manaschis cun chauns da protecziun da muntaneras ha en il fratemp chauns pasturs anatolais u vul lavurar cun tals chauns. Sche questa razza da chauns na vegniss betg renconuschida en il program naziunal, resultassan en l'avegnir consequenzas negativas vastas e gravantas. Tut ils manaschis activs en il chantun Grischun na pudessan – malgrà resultats persvadents – betg pli lavurar vinavant cun lur chauns e vegnissan exclus da la renconuschientscha federala uffiziala.
Video ed ulteriuras infurmaziuns davart il tema "protecziun da muntaneras" en il Grischun
Via da guaud pli lada en il Ronenwald a Tavau
La regenza ha approvà il project "Via da guaud Ronenwald" da la vischnanca da Tavau ed ha deliberà per quest intent ina contribuziun chantunala da maximalmain 930 000 francs. Il project prevesa da renovar ina via da guaud existenta sin ina lunghezza da 675 meters e da far londeror ina via che po vegnir duvrada er da camiuns. Plinavant vegn renovada ina via champestra agricula e forestala existenta che sa sparta da la via da guaud e ch'è 90 meters lunga. Il project cumenza tar la sortida dal vitg da Monstein a la fin da la via chantunala e suonda la via existenta en direcziun da l'Oberalp.
©Markus Hubert
Damain accidents grazia ad ina nova rundella a Puntraschigna
Puntraschigna è collià cun la via dal Bernina sur trais access. L'access amez "Gitögla" serva sco colliaziun cun la staziun da Puntraschigna ed er cun il center dal vitg cun sias diversas fatschentas e ses differents hotels. Dapi che la vischnanca da Puntraschigna ha construì quest access l'onn 1977, hai dà regularmain accidents da traffic. Il dumber d'accidents n'ha er betg pudì vegnir reducì tras l'aboliziun dal vial per sviar a dretga.
La regenza ha ussa approvà il project "Midada da l'access Gitögla" per pudair ademplir las pretensiuns da segirezza odiernas. En il rom da la transfurmaziun dal nuf da traffic vegn construida per quest intent ina nova rundella.
Projects da votaziun dals 19 da matg 2019
La regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel la dumengia, ils 19 da matg 2019:
- lescha federala dals 28 da settember 2018 davart la refurma fiscala e la finanziaziun da la AVS (RFFA); e
- conclus federal dals 28 da settember 2018 davart l'approvaziun e la realisaziun dal barat da notas tranter la Svizra e la UE concernent la surpigliada da la directiva (UE) 2017/853 per midar la directiva da la UE davart las armas (svilup da l'acquist da Schengen).
La dumengia, ils 19 da matg 2019, vegni ultra da quai votà davart il suandant project chantunal:
- iniziativa dal pievel per abolir la chatscha speziala (iniziativa cunter la chatscha speziala).
Gremi: regenza
Funtauna: rg chanzlia chantunala dal Grischun