Las materialias d'infurmaziun per la protecziun da la giuventetgna stattan a disposiziun en in nov design frestg a manaschis da la gastronomia, al commerzi en detagl ed ad organisaturs d'occurrenzas. Las materialias renvieschan al scumond da vender alcohol e products da tubac a giuvenils e dattan infurmaziuns e cussegls impurtants al persunal da vendita e da service per far valair la protecziun da la giuventetgna.

Il chantun Grischun ha repassà e rinfrestgà – ensemen cun ils chantuns Appenzell Dador, Appenzell Dadens, Son Gagl e Turgovia – las materialias cuminaivlas per la protecziun da la giuventetgna. Latiers tutgan placats A4, tatgaders, infurmaziuns per il persunal da vendita e da service, ina glista da controlla per organisaturs da festas sco er bindels da controlla da differentas colurs per las differentas vegliadetgnas. Tut las materialias renvieschan a las disposiziuns legalas. Las leschas naziunalas e chantunalas scumondan da vender bavrondas alcoholicas e products da tubac a persunas sut 16 onns e da vender spirituosas, aperitivs ed alcopops a persunas sut 18 onns. Al punct da vendita sto vegnir montada en moda bain visibla ina tavla d'infurmaziun che renda attent al scumond da vender alcohol e products da tubac ad uffants ed a giuvenils.

Las materialias da checkpoint per la protecziun da la giuventetgna sustegnan dapi onns ils manaschis da gastronomia, il commerzi en detagl ed ils organisaturs d'occurrenzas a far valair al lieu la protecziun da la giuventetgna. Las materialias pon vegnir empustadas gratuitamain ed online tar la partiziun "promoziun da la sanadad e prevenziun" da l'uffizi da sanadad sut www.bischfit.ch/jugendschutz. Sin la pagina d'internet èn er da chattar in calculatur digital per controllar la vegliadetgna ed indicaziuns davart eventualas scolaziuns dal persunal.

Fotografias agiuntadas:

Infurmaziuns:
Denise Rudin, manadra da la partiziun "promoziun da la sanadad e prevenziun", uffizi da sanadad, tel. 081 257 64 02 u 078 746 42 20, e-mail Denise.Rudin@san.gr.ch


Gremi: uffizi da sanadad
Funtauna: rg uffizi da sanadad