L'occurrenza da "trampolin" GR è in'occurrenza da carriera extraordinaria. Stabilir contacts cun interpresas dal chantun Grischun ed obtegnair – sin ina visita tar las interpresas – ina meglra basa da decisiun per far il pass en il mund da lavur. Da questa schanza vegnan var 80 studentas e students a profitar a chaschun da l'occurrenza da "trampolin" GR.

L'uffizi chantunal per economia e turissem, l'uffizi chantunal per la furmaziun media-superiura, la SATE Cuira e la Graduate School dal Grischun organiseschan dapi l'onn 2006 l'occurrenza da "trampolin" en cooperaziun cun l'organisaziun d'occurrenzas together SA. La sponsura principala è dapi il cumenzament la banca chantunala grischuna. Quest onn ha l'occurrenza da "trampolin" lieu glindesdi, ils 15 d'avrigl 2019. Tras quai vegnan las interpresas grischunas sustegnidas tar la recrutaziun da lur persunal spezialisà, e la reputaziun dal Grischun sco regiun da lavur tar las studentas ed ils students vegn influenzada en moda positiva. Mintga onn profitan var 80 studentas e students da scolas autas e d'universitads da la Svizra da la pussaivladad d'emprender d'enconuscher las differentas interpresas grischunas sco patrunas.

Contact persunal sco schanza
A l'occurrenza da "trampolin" survegnan las interpresas la pussaivladad da dar a las studentas ed als students da bachelor e da master cun la direcziun da studi giavischada ina invista persunala en lur lavur. Uschia entran ellas en contact cun praticantas e praticants potenzials ubain cun expertas ed experts futurs, ed ellas pon sa preschentar sco patrunas attractivas. Ellas emprendan d'enconuscher las studentas ed ils students, entant che quellas e quels obtegnan ina invista particulara da las interpresas. Las studentas ed ils students sco er las persunas d'interpresas participadas han – en lur reacziun als events dals onns precedents – adina accentuà il niz vicendaivel da questa occurrenza. Entant che las interpresas pon recrutar talents bain scolads, stattan per las studentas ed ils students en il center il barat informal e las visitas guidadas impressiunantas da las firmas.

Quest onn sa participeschan las suandantas interpresas a l'occurrenza: EMS-CHEMIE SA, Graduate School dal Grischun, Banca chantunala grischuna, Hamilton Bonaduz SA, Inventx SA, Landqart SA, OBLAMATIK SA, Viafier retica SA e TRUMPF Svizra SA.

Ins po anc s'annunziar
L'occurrenza da "trampolin" GR è ina da totalmain nov occurrenzas da "trampolin" en Svizra ed ha lieu glindesdi, ils 15 d'avrigl 2019. Studentas interessadas e students interessads pon anc s'annunziar per l'occurrenza da "trampolin" sut www.sprungbrett-events.ch.

Program:
13.15 – 17.00: visita da las interpresas (lavuratori)
17.00 – 17.30: transfer individual a l'auditori da la BCG a Cuira
17.30 – 19.00: bainvegni uffizial da las represchentantas e dals represchentants chantunals, curta preschentaziun da las interpresas suandada d'in apero da talent


Fotografia:

Apero da talent da l'occurrenza da "trampolin" en il Grischun 2018
©together SA 

Infurmaziun per las collavuraturas ed ils collavuraturs da las medias:
Las collavuraturas ed ils collavuraturs da las medias èn envidads d'accumpagnar l'occurrenza cun lur media. L'uffizi per economia e turissem sustegna gugent l'organisaziun al lieu.

Infurmaziuns:
Paolo Giorgetta, svilup da l'industria locala, uffizi per economia e turissem, tel. 081 257 23 75, e-mail Paolo.Giorgetta@awt.gr.ch


Gremi: uffizi per economia e turissem
Funtauna: rg uffizi per economia e turissem