Cuntegn da la pagina

Communicaziun da la regenza dals 25 d'avrigl 2019

  • Erste Mitteilung
  • Neuen Beitrag einfügen
La regenza ha prendì posiziun tar l'introducziun previsa da l'e-voting sco terz chanal da votaziun ordinari. Ultra da quai ha ella approvà in project da protecziun cunter lavinas sin il pass dal Lucmagn e concedì contribuziuns chantunalas per la renovaziun d'ina chamona dal Club alpin svizzer a Zuoz.

E-voting: la regenza sustegna vinavant l'introducziun ordinaria 

La regenza è s'exprimida en il rom d'ina consultaziun da la chanzlia federala areguard las midadas previsas da la lescha federala davart ils dretgs politics. Cun questas adattaziuns duai il manaschi d'emprova cun e-voting vegnir terminà e la votaziun electronica vegnir francada en la lescha sco chanal da votaziun ordinari. Dapi circa 15 onns pon las votantas ed ils votants en differents chantuns eleger e votar – sco emprova – sin via electronica.
La regenza grischuna sustegna anc adina la strategia cuminaivla da la confederaziun e dals chantuns per introducir il terz chanal da votaziun. Ella ha prendì enconuschientscha dal fatg ch'i n'è betg reussì – en il rom dal test d'intrusiun public (PIT) dals 25 da favrer fin ils 24 da mars 2019 – da haccar l'urna electronica dal nov sistem cun verificabilitad universala da la Posta, e quai malgrà il dumber d'annunzias da var 3200 persunas or da 137 pajais. En l'urna electronica na sa chattavan naginas vuschs manipuladas. A medem temp ha la publicaziun dal code da funtauna permess da scuvrir trais largias criticas en il sistem, ch'èn gia vegnidas eliminadas da la Posta. Il chantun Grischun beneventa explicitamain la verificaziun ed eventualmain l'adattaziun dal process da certificaziun e d'admissiun, che la confederaziun ha annunzià. En spezial pari dad esser indispensabel, che expertas ed experts independents fetschian regularmain in'examinaziun tematica dal code da funtauna e dal sistem sin plaun federal. Per la credibladad dals chantuns en lur stentas per extender l'e-voting èsi central ch'els possian sa basar sin ina procedura d'examinaziun e da certificaziun fidada ed effizienta sin plaun federal. Suenter ina fasa d'emprova da 15 onns duai – tenor la regenza – l'e-voting ussa vegnir etablì sco terz chanal da votaziun ordinari ed equivalent. Ils sbagls ch'èn vegnids constatads en il rom dal PIT e da la publicaziun dal code da funtauna na duain midar nagut vi da quai. Cun quest pass sin plaun federal resulta numnadamain per ils chantuns la segirezza giuridica e la segirezza da planisaziun ch'els dovran.
Per il project dad e-voting en il Grischun vali anc adina che la segirezza ha l'emprima prioritad e che la votaziun electronica vegn introducida pir, cur ch'in sistem dad e-voting verifitgabel cumplettamain stat a disposiziun. Quest sistem sto correspunder a tut las pretensiuns da segirezza tenor il dretg federal ed esser certifitgà ed admess correspundentamain da la confederaziun.

Consultaziuns da la chanzlia federala

Dapli segirezza cunter lavinas sin il pass dal Lucmagn
La regenza ha approvà in project da protecziun cunter lavinas da l'uffizi da construcziun bassa per il pass dal Lucmagn. Dapi l'enviern 2000/2001 vegn la via dal pass tranter il Grischun ed il Tessin tegnida averta durant l'entir onn, sche la situaziun da lavinas permetta quai. Il traject tranter Fuorns e Campra è periclità da tut en tut 84 laviners. Cun l'engrondiment dal rempar da lavinas Stgegia duai vegnir augmentada la segirezza sin questa ruta.
Il project prevesa da segirar il territori cun raits da naiv d'ina lunghezza totala da circa 300 meters. Questas mesiras architectonicas han lieu en duas etappas e duain vegnir terminadas l'onn 2020. Ils custs totals dal project importan circa 1,3 milliuns francs.
-
©Uffizi federal da topografia
Ils rempars da lavinas planisads (mellen) en il sectur da privel Stgegia (cotschen)

Renovaziun pretensiusa da la chamona d'Es-cha a Zuoz
En il rom da la nova politica regiunala (NPR) ha la regenza concedì a la secziun Bernina dal Club alpin svizzer (CAS) ina contribuziun chantunala da circa 127 700 francs per renovar la chamona d'Es-cha. La contribuziun vegn concedida en connex cun in emprest tenor NPR da la confederaziun da 550 000 francs. Plinavant ha la regenza concedì 100 000 francs or da la finanziaziun speziala "sport".
Cun la renovaziun da la chamona d'Es-cha duai vegnir cuntanschida ina gestiun moderna dals giasts che pernotteschan e dals giasts dal di. La purschida existenta cun circa 50 plazzas da durmir na vegn però betg augmentada. Tras la renovaziun architectonica duai vegnir mess a disposiziun als giasts in alloschi attractiv da muntogna che attira er adina dapli giasts dal di durant la stad e durant l'enviern. Ils custs totals per la renovaziun da la chamona d'Es-cha CAS importan var 2,3 milliuns francs.
-
Gia oz è la chamona d'Es-cha in alloschi CAS apprezià.

Gremi: regenza
Funtauna: rg chanzlia chantunala dal Grischun
Neuer Artikel