Zum Seiteninhalt

La regenza dal chantun Tessin ha retschavì la regenza dal Grischun

A chaschun d'ina scuntrada da lavur ha la regenza dal chantun Tessin retschavì oz en il Palazzo delle Orsoline la regenza grischuna. La scuntrada dad oz è ina cuntinuaziun da l'inscunter da la fin da favrer da l'onn passà en la Val Mesauc ed ha dà l'occasiun da discutar differents temas politics d'interess cuminaivel.

La regenza tessinaisa sut la direcziun dal president Christian Vitta ha beneventà oz a Bellinzona la regenza grischuna. Da la delegaziun tessinaisa faschevan ultra da quai part ils cussegliers guvernativs Norman Gobbi, Manuele Bertoli, Claudio Zali, Raffaele De Rosa, il chancelier Arnoldo Coduri e l'incumbensà per relaziuns externasFrancesco Quattrini. La scuntrada odierna è ina cuntinuaziun da l'inscunter, che ha gì lieu la fin da favrer da l'onn passà en la Val Mesauc, e dat perditga da las relaziuns excellentas tranter ils dus chantuns.

En il decurs dals discurs politics durant l'emprima part da la scuntrada han las duas regenzas discutà numerus temas d'interess cuminaivel. En quest connex èn dumondas dal provediment d'energia futur en noss pajais stadas en il center cun in accent spezial sin ils svilups en il sectur da la forza idraulica. Ultra da quai han las regenzas discutà il tema da las firmas fictivas en la Val Mesauc sco er dumondas dals secturs traffic, taglias, planisaziun dal territori e planisaziun da la sanadad.

A l'ur da la scuntrada è vegnida suttascritta ina cunvegna davart la collavuraziun tranter ils dus chantuns che permetta a las persunas obligadas da far servetsch da protecziun civila che derivan da las regiuns Moesa, Bernina e Malögia da frequentar en il futur la furmaziun tecnica da basa en lingua taliana en il center chantunal d'instrucziun Rivera.

Fotografia:
-

© Chanzlia chantunala dal Tessin


Infurmaziuns:
president da la regenza Jon Domenic Parolini, schef dal departament d'educaziun, cultura e protecziun da l'ambient, e-mail Jondomenic.Parolini@ekud.gr.ch  


Organ: chanzlia chantunala
Funtauna: rg chanzlia chantunala