La regenza ha deliberà la missiva tar la "renovaziun dal center da dietas Plantahof, Landquart" per mauns dal cussegl grond.

Sco center da cumpetenza per l'agricultura ha il Plantahof ina posiziun predominanta en la Svizra tudestga e sco instituziun da furmaziun e da cussegliaziun è el d'impurtanza surregiunala. Ils edifizis dal center da dietas che consistan da la sala da mangiar cun cuschina sco er da l'alloschi per las emprendistas ed ils emprendists han – suenter ch'els èn gia en funcziun dapi 40 onns – in grond basegn da vegnir renovads. Els na correspundan betg pli a las pretensiuns d'ozendi.

Infrastructura progressiva
Tenor il project da la missiva vegnan ils edifizis dal center da dietas construids da nov confurm al temp ed ils andaments manaschials detretschads. Las pretensiuns energeticas, ecologicas e da la segirezza tecnica sco er da la construcziun senza obstachels pon vegnir realisadas optimalmain. Cun la construcziun nova vegn rinforzada la situaziun da l'architectura locala e realisada ina infrastructura progressiva per il Plantahof.

Ils custs d'investiziun per ils edifizis cumpensatorics novs previs importan tut en tut 24,5 milliuns francs. Sch'il cussegl grond approvescha il project da construcziun ed il credit d'impegn, ha la votaziun dal pievel necessaria lieu il favrer 2020.

Visualisaziun:

©Nickisch Walder, architects 

Agiunta:
Missiva 


Infurmaziuns:
cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch


Gremi: regenza
Funtauna: rg departament da construcziun, traffic e selvicultura