Zum Seiteninhalt

Deliberà la lescha davart la promoziun da la transfurmaziun digitala per la consultaziun

La regenza ha dà en consultaziun la lescha davart la promoziun da la transfurmaziun digitala en il Grischun.

En la sessiun d'avust 2018 ha il cussegl grond incumbensà la regenza da stgaffir las basas necessarias per ch'in credit d'impegn da 40 milliuns francs possia vegnir mess a disposiziun per dar in stausch a la digitalisaziun en il Grischun. La regenza propona ina nova lescha da durada limitada che cuntegna las disposiziuns per furmar quest credit d'impegn e che regla, co che quest credit duai vegnir utilisà. Ultra da quai vegnan francads en questa lescha ils princips per promover la transfurmaziun digitala e per finanziar projects da digitalisaziun.

Promoziun sistematica en ils secturs centrals
La regenza ha identifitgà en la lescha secturs centrals, en ils quals la transfurmaziun digitala po vegnir promovida cun meds supplementars. Per exempel duai il chantun far avanzar la digitalisaziun en il sectur da l'economia (innovaziun e turissem). Er il sectur da furmaziun tutga tar ils champs impurtants, nua che mesiras vegnan giuditgadas sco cunvegnentas. Ils secturs da sanadad sco er da mobilitad e traffic cumpletteschan ils temas centrals.

Independentamain da quai vul la regenza er promover l'extensiun d'infrastructuras da rait effizientas en il chantun Grischun, pia sustegnair l'avertura da las regiuns cun bindel ultralad. Ultra da quai duai vegnir promovì l'e-government per cuntanscher process nuninterruts da las autoritads ed in'administraziun digitala. Per quest intent na duain dentant betg vegnir duvrads meds finanzials or da quest credit d'impegn general; las mesiras respectivas vegnan finanziadas autramain.

La consultaziun dura dals 20 da zercladur fin ils 20 da settember 2019. Il cussegl grond vegn a tractar questa fatschenta previsiblamain durant la sessiun da zercladur 2020.

Documents da consultaziun: www.gr.ch>Rumantsch>Publicaziuns>Consultaziuns


Infurmaziuns:

cusseglier guvernativ Marcus Caduff, schef dal departament d'economia publica e fatgs socials, tel. 081 257 23 01, e-mail Marcus.Caduff@dvs.gr.ch


Gremi: regenza
Funtauna: rg departament d'economia publica e fatgs socials