Navigation

Inhaltsbereich

  • Erste Mitteilung
  • Neuen Beitrag einfügen
La tgira da monuments dal Grischun, il servetsch archeologic dal Grischun e la Protecziun da la patria dal Grischun organiseschan mintga onn en collavuraziun cun partenaris regiunals e locals ils Dis europeics dal patrimoni en il Grischun. L'occurrenza da quest onn ha lieu ils 14 ed ils 15 da settember a Glion e dat l'occasiun da s'occupar cun la ritgezza da las fassettas da noss patrimoni cultural sco er da tgirar la discussiun davart la cultura architectonica cun la populaziun e cun persunas spezialisadas.

Sut il motto "Farben – Couleurs – Colori – Colurs" sa participescha la Svizra per la 26avla giada als Dis europeics dal patrimoni. Sco lieu d'occurrenza ha il chantun Grischun tschernì quest onn la citad veglia da Glion e ses conturns. En la citad veglia chattan ins colurs dapertut. Fatschadas coluradas, picturas muralas giaglias u er simplas decoraziuns en differentas nianzas.

Chasas istoricas e colurs
Sut il titel "Chasas avertas" dattan possessuras e possessurs d'immobiglias istoricas a Glion ils 14 da settember ina invista da las localitads e da l'istorgia da lur chasas al public interessà. Per grond e pitschen porschan las collavuraturas ed ils collavuraturs da la tgira da monuments dal Grischun turas guidadas cun differents accents tematics sin l'istorgia, sin il maletg dal vitg e sin la substanza architectonica preziusa. En il rom da la visita dal lavuratori ed a chaschun dal di da las portas avertas tar la Baukunst Graubünden survegnan visitadras e visitaders infurmaziuns davart veglias tecnicas artisanalas e davart la dumonda, co ch'ina chasa survegn sia colur. En il clutger da la baselgia da sontga Margreta survegnan ellas ed els ina invista da la lavur cun pigments da crappa regiunala. Il servetsch archeologic dal Grischun mussa exemplars originals d'objects chattads en Surselva. La Protecziun da la patria dal Grischun terminescha quest emprim Di dal patrimoni cun in referat davart la rolla centrala da las resursas e dals materials locals en il process dal svilup architectonic.

Colurs uschè lunsch sco ch'ins vesa
La colur duai accumpagnar l'occurrenza da quest onn er en il senn figurativ. La vischnanca da Glion sa cumpona da 13 fracziuns. Ils singuls maletgs dals lieus èn classifitgads en l'inventari federal dals lieus svizzers d'impurtanza naziunala degns da protecziun (ISOS) en las categorias local (l), regiunal (r) e schizunt naziunal (n). Mintgina da questas fracziuns è particulara areguard la cultura architectonica ed areguard la mentalitad da sias abitantas e da ses abitants. Entaifer in lieu resulta uschia in puschel giagl da cuminanzas individualas. Dumengia, ils 15 da settember, accumpogna ina collavuratura da l'uffizi federal da cultura (UFC) ina tura guidada tras intgins vitgs cun in auto da posta da pli baud, per explorar maletgs da vitgs impurtants. Las participantas ed ils participants visitan ils vitgs da Pitasch (r), Duin (n) e Luven (n) ed emprovan da perscrutar cuminaivlamain las atgnadads.

Ils Dis dal patrimoni da quest onn vegnan averts sonda, ils 14 da settember 2019, a las 10.00 en la curt dal museum regiunal Surselva.
 

Ulteriuras infurmaziuns:
www.dpg.gr.ch e www.hereinspaziert.ch

Agiunta:
program dals Dis europeics dal patrimoni en il Grischun

Fotografias agiuntadas:
- Il mund giagl dals pigments da crappa dals pizs da la Surselva
- Chats archeologics da la Surselva
- Duin: Visita da maletgs da vitgs impurtants


Infurmaziuns:
Simon Berger, tgirader da monuments / tgira da monuments dal Grischun / uffizi da cultura, tel. 081 257 27 91, e-mail Simon.Berger@dpg.gr.ch


Gremi: uffizi da cultura
Funtauna: rg uffizi da cultura
Neuer Artikel