Navigation

Inhaltsbereich

  • Erste Mitteilung
  • Neuen Beitrag einfügen
La regenza ha concedì contribuziuns chantunalas per spustar la "Chasa alva" a Mulegns e per renovar il provediment d'aua da Sumvitg.

La stretga da Mulegns vegn eliminada
La Nova Fundaziun Origen planisescha la revitalisaziun da Mulegns ed ina nova utilisaziun da la substanza architectonica en il center istoric dal vitg. Cun spustar la "Chasa alva" che cunfinescha cun la via dal Güglia duai la stretga vegnir eliminada e l'edifizi duai vegnir mantegnì en moda integrala. Il project per spustar la "Chasa alva" e per concepir ils conturns (incl. renovaziun da la via chantunala), ch'è vegnì elavurà da la Nova Fundaziun Origen ed approvà da la vischnanca da Surses, è vegnì suttamess al chantun. La regenza ha acceptà il project ed ha concedì ina contribuziun chantunala da maximalmain 1 950 000 francs, perquai ch'il project pussibilitescha d'eliminar la stretga sin la via chantunala.
L'onn 2018 aveva il chantun organisà ina concurrenza cun l'intent da chattar ina soluziun adattada per eliminar la stretga da Mulegns. Il project victur ch'era vegnì recumandà da la giuria d'experts, preveseva in'adattaziun geometrica da la "Chasa alva" a favur d'ina via pli lada. Il project ch'era silsuenter vegnì exponì publicamain, è vegnì annullà en il fratemp. Damai che la Nova Fundaziun Origen ha l'intenziun da cumprar l'immobiglia e cunquai che la "Chasa alva" vegn lura spustada, po vegnir realisada ina soluziun che stat en l'interess da tuts.

Renovaziun dal provediment d'aua da Sumvitg
La regenza ha garantì a la vischnanca da Sumvitg ina contribuziun chantunala da maximalmain 427 050 francs per renovar ses provediment d'aua (terza etappa). La garanzia premetta in subvenziunament correspundent da la confederaziun. La terza etappa da la sanaziun cuntegna ils novs conducts davent da la staziun per reducir la pressiun a Clavadi fin al reservuar a Cumpadials e da là vinavant fin a la colliaziun cun la rait da provediment da Cumpadials. En questa terza etappa vegn er construida la staziun per reducir la pressiun a Clavadi e sanà il reservuar existent a Cumpadials.
- -
©Biro d'inschigner Deplazes, Surrein
Ils stabiliments che ston vegnir sanads en la terza etappa


Gremi: regenza
Funtauna: rg chanzlia chantunala dal Grischun
Neuer Artikel