Navigation

Inhaltsbereich

  • Erste Mitteilung
  • Neuen Beitrag einfügen
La regenza ha prendì posiziun tar ils plans da pajar prestaziuns transitoricas federalas a persunas dischoccupadas pli veglias sco er tar l'idea d'introducir in cataster naziunal da conducts. Plinavant ha ella approvà ina midada da sistem en l'instrucziun da polizistas e polizists.

La regenza beneventa da princip las prestaziuns transitoricas per persunas dischoccupadas pli veglias
La regenza ha prendì posiziun tar la lescha federala planisada davart prestaziuns transitoricas per persunas dischoccupadas pli veglias. Cun quest project da lescha vul il cussegl federal meglierar la situaziun da persunas dischoccupadas che na survegnan betg pli l'indemnisaziun da dischoccupaziun. Per questas persunas duai vegnir introducida ina prestaziun transitorica. Quella duai vegnir pajada a partir dal mument che la persuna dischoccupada perda il dretg da l'indemnisaziun da dischoccupaziun, fin a ses pensiunament, premess che questa perdita haja lieu suenter il 60. onn da vegliadetgna.
Sco las conferenzas dals directurs chantunals da l'economia publica (CDE) e dals directurs chantunals dals affars socials (CDAS) giuditgescha er la regenza il project da princip en moda positiva. Per ella èsi dentant impurtant ch'i na vegnian stgaffids nagins fauss impuls cun las prestaziuns transitoricas. Malgrà las prestaziuns transitoricas sto la motivaziun da lavurar esser avant maun er vinavant. Las prestaziuns transitoricas na dastgan betg augmentar ulteriuramain la mancanza da persunas spezialisadas. Plinavant renda la regenza attent che l'assicuranza d'invaliditad (AI) è obligada da conceder mesiras d'integraziun er a persunas da 60 onns e dapli, sch'ellas inoltreschan ina dumonda da prestaziun, u da prender en consideraziun da pajar ina renta, suenter che las mesiras d'integraziun pretendiblas n'han gì nagin success. Tar las prestaziuns transitoricas na duai dentant explicitamain betg pli esser pussaivel da pretender che las persunas pertutgadas sa stentian da chattar ina plazza. Uschia stattan las prestaziuns transitoricas en cuntradicziun cun las stentas da la AI da sclerir las schanzas d'integraziun e las activitads pretendiblas e – sche necessari – er da decider da maniera correspundentamain consequenta. Perquai pretenda la regenza che questa cuntradicziun vegnia sclerida e ch'il project vegnia adattà, uschia che la reintegraziun vegnia designada explicitamain sco prioritara e ch'ils princips da la AI na vegnian betg relativads.

Consultaziuns dal Departament federal da l'intern DFI

La regenza refusa in cataster naziunal da conducts

La regenza ha prendì posiziun tar il rapport federal "Visiun, strategia e concept dal cataster svizzer da conducts". La regenza grischuna refusa decididamain in cataster naziunal da conducts.
Il cataster da conducts è in instrument da coordinaziun impurtant per schliar incumbensas da planisaziun en il spazi public. Perquai ha il chantun Grischun gia instradà ina concentraziun da las datas dals catasters da conducts sin plaun chantunal e relaschà il matg 2016 in'ordinaziun correspundenta. Dapi lura vegn realisada l'installaziun dal cataster chantunal correspundent. In cataster naziunal avess dischavantatgs considerabels. Er en cas d'ina fitg buna coordinaziun tranter las parts participadas fissan ils chantuns, ma er las vischnancas ed ils gestiunaris da las ovras, sfurzads d'adattar lur sistems. Per il chantun Grischun cun sia proporziun disfavuraivla tranter infrastructura e forza finanziala èn questas adattaziuns ina chargia strusch supportabla. Ils custs da paucs milli francs per post participà, che vegnan menziunads en il rapport, ston vegnir considerads – tenor l'experientscha – sco limita la pli bassa. Tut tenor la soluziun tschernida ston vegnir fatgas charas midadas vi da las datas, quai che pudess chaschunar custs ch'èn pliras giadas pli gronds. Tut segund l'interpretaziun dal rapport stuessan las parts participadas surpigliar sezzas la mesadad u tschient pertschient da quests custs. Quai na stat en nagina relaziun cun il niz supplementar inexistent cumpareglià cun il cataster chantunal actual.

Consultaziuns dal departament federal da defensiun, protecziun da la populaziun e sport (DDPS)

Midada da sistem en l'instrucziun da polizistas e polizists

La regenza ha approvà la revisiun parziala da l'ordinaziun da polizia. L'instrucziun da basa da las polizistas e dals polizists dura da nov en l'entira Svizra dus onns. L'emprim onn da l'instrucziun ha lieu en in dals sis centers d'instrucziun regiunals; per la polizia chantunala dal Grischun èn quai la scola da polizia da la Svizra orientala ad Amriswil u scola da polizia a Giubiasco. L'emprim onn vegn terminà cun l'examen davart la capacitad d'intervenziun. Quest examen unitar sin plaun naziunal correspunda da princip a l'examen professiunal dal sistem actual d'in onn. In element nov è en spezial quel che las absolventas ed ils absolvents ston sa cumprovar – en ina part da l'examen a bucca – davart valurs, normas e tenutas. En il segund onn applitgeschan las polizistas ed ils polizists futurs en ils corps da polizia respectivs en moda pratica quai ch'els han emprendì e termineschan l'instrucziun cun l'examen professiunal federal. L'instrucziun prolungada cumenza il 1. d'october 2019. L'emprim examen davart la capacitad d'intervenziun ha correspundentamain lieu l'atun 2020 e l'emprim nov examen professiunal l'atun 2021. Tras questa midada da sistem en l'instrucziun, pervia d'intginas novas pretensiuns tar la recrutaziun sco er tras l'introducziun da la nova unifurma ston vegnir adattads intgins artitgels da l'ordinaziun da polizia.

Sanaziun da la punt a Sedrun
La regenza ha approvà in project per la renovaziun da la via sursilvana sin il traject punt dal Drun a Sedrun. L'artg existent da crappa natirala datescha dal temp da la construcziun da la via da l'Alpsu ils onns 1863/64. Cunquai che la punt dal Drun ha donns e perquai che la segirezza dal sistem purtant è insuffizienta, sto la punt vegnir renovada.
Il project cumpiglia tranter auter il remplazzament da la cuvrida dals vials e dals passapes sco er la sanaziun da la platta dals vials. Ultra da quai vegnan renovads il betun ed il mir da crappa rutta. Ils custs totals dal project importan circa 1,9 milliuns francs.

-

La regenza ha fixà la tariffa da contribuziun per purschidas da la tgira d'uffants cumplementara a la famiglia
Tut tenor ils basegns individuals stattan a disposiziun ad uffants da la vegliadetgna prescolara – sco furmas da tgira – canortas, uniuns da geniturs da di sco er geniturs da di privats. Questas structuras da tgira vegnan finanziadas tras contribuziuns dals geniturs, tras donaziuns sco er tras las contribuziuns dal chantun e da las vischnancas. La regenza fixescha mintga onn ils custs normads e la tariffa da contribuziun dal chantun per purschidas da la tgira d'uffants cumplementara a la famiglia.
La calculaziun dals custs normads 2020 n'ha chaschunà naginas midadas vi da la media da la tariffa dals custs normads; quella resta tar 9,05 francs per ura da tgira ed uffant. Tenor la resposta a l'incumbensa Hardegger concernent la revisiun da la lescha davart la promoziun da la tgira d'uffants cumplementara a la famiglia en il chantun Grischun planisescha la regenza d'auzar ils custs normads per l'onn 2021. La tariffa da contribuziun per novas purschidas importa durant ils emprims 3 onns 25 pertschient dals custs normads. Per tut las ulteriuras purschidas importa la tariffa 20 pertschient. Qua tras resulta l'onn 2020 in sustegn finanzial dal chantun da totalmain circa 3,45 milliuns francs per la tgira d'uffants cumplementara a la famiglia. Las vischnancas sustegnan las purschidas cun la medema summa. La planisaziun dal basegn 2020 da las vischnancas fa quint cun var 719 plazzas per la tgira d'uffants cumplementara a la famiglia.


Gremi: regenza
Funtauna: rg chanzlia chantunala dal Grischun
Neuer Artikel