Zum Seiteninhalt

Nov secretari per il departament da finanzas

La regenza grischuna ha nominà Patrik Galliard sco nov secretari dal departament da finanzas e vischnancas. El vegn a surpigliar questa funcziun a partir dal 1. d'avrigl 2020, suenter ch'el è vegnì introducì en la lavur.

La regenza grischuna ha elegì l'advocat lic. iur. Patrik Galliard sco nov secretari dal departament da finanzas e vischnancas. Galliard ha 46 onns ed è dad Untervaz. El ha lavurà per differentas autoritads. Ils ultims 12 onns ha el surpiglià differentas funcziuns tar la surveglianza dal martgà da finanzas dal Liechtenstein, l'ultim sco manader da partiziun. Patrik Galliard viva cun sia famiglia a Cuira. El daventa successur da Beat Ryffel che va en pensiun la fin da mars 2020 suenter 30 onns sco secretari dal departament.

Il departament da finanzas e vischnancas ademplescha differentas incumbensas sco l'administraziun da taglia, la surveglianza da las vischnancas u la valitaziun d'immobiglias. Ultra da quai surpiglia el incumbensas interdisciplinaras per l'entira administraziun. Latiers tutgan en spezial servetschs d'informatica, la budgetaziun e la planisaziun da las finanzas sco er il management dal persunal. Il secretariat dal departament è in liom central tranter il departament ed ils posts da servetsch appartegnents. El planisescha e coordinescha las fatschentas dal departament e sustegna ils posts da servetsch.

Fotografia agiuntada:
-

Patrik Galliard, nov secretari dal DFV


Infurmaziuns:
cusseglier guvernativ dr. Christian Rathgeb, schef dal departament da finanzas e vischnancas, tel. 081 257 32 01, e-mail Christian.Rathgeb@dfg.gr.ch  


Gremi: regenza
Funtauna: rg chanzlia chantunala