Zum Seiteninhalt

GUARDA! puraria "Dal prà sin maisa"

  • Erste Mitteilung
  • Neuen Beitrag einfügen
A chaschun da la GUARDA! da quest onn – che dura dals 31 d'october fin ils 3 da november – preschenta l'agricultura grischuna, en l'exposiziun speziala "Dal prà sin maisa", il tema "charn". Las visitadras ed ils visitaders da la messa vegnan infurmads en moda bain chapaivla e fitg reala davart ils connexs ed ils andaments da la producziun agricula per lung da l'entira chadaina da valurisaziun.

L'agricultura grischuna ha ina gronda impurtanza per il chantun Grischun. Ella cumpiglia var 5 pertschient da tut las plazzas da lavur, producescha materias primas e products d'auta qualitad ed è responsabla per la tgira e per il mantegniment da la cuntrada cultivada e natirala sco premissa fundamentala per il turissem grischun.

Cun il tema principal da quest onn, la charn, vegn preschentada ad in vast public ina part essenziala da la valurisaziun da l'agricultura grischuna. Sut il motto "Dal prà sin maisa" vegn uschia prestada ina contribuziun per augmentar la valur dals products da charn regiunals en il Grischun.

Las famiglias purilas grischunas tegnan lur animals da niz tenor pretensiuns legalas severas e prestan a medem temp ina contribuziun per la segirezza alimentara da noss pajais. Pervia da las premissas natiralas vegnan producidas las victualias en il territori da muntogna bunamain mo cun tegnair animals da niz.

Sin differents stans ed a maun da divers exponats vegn l'entira chadaina d'elavuraziun e da valurisaziun mussada ed explitgada en moda bain chapaivla e cun l'accumpagnament professiunal da las puras e dals purs. A medem temp vesan las visitadras ed ils visitaders da la messa ils avantatgs d'in nutriment equilibrà, ils effects positivs dal diever da products regiunals sco er las pussaivladads da sa nutrir schanegiond il clima.

Sut la direcziun da l'uniun purila grischuna han cooperà per questa preschentaziun organisaziuns grischunas impurtantas da las branschas agricultura, transport, elavuraziun da charn e gastronomia / hotellaria, partenaris sco alpinavera e graubündenVIVA, ma er organisaziuns activas sin nivel naziunal. Sustegnids vegnan quests gremis da l'uffizi d'agricultura e da geoinfurmaziun sco er da l'uffizi per la segirezza da victualias e per la sanadad d'animals.


Infurmaziuns:

Daniel Buschauer, manader da l'uffizi d'agricultura e da geoinfurmaziun, tel. 081 257 24 31, e-mail Daniel.Buschauer@alg.gr.ch


Funtauna: rg uffizi d'agricultura e da geoinfurmaziun
Gremi: rg uffizi d'agricultura e da geoinfurmaziun
Neuer Artikel