Navigation

Inhaltsbereich

  • Erste Mitteilung
  • Neuen Beitrag einfügen
Il Grischun metta in segn cunter violenza a chasa e cunter violenza envers dunnas. Dals 25 da november fin ils 10 da december 2019 rendan differentas organisaziuns en il Grischun attent cuminaivlamain a questas violaziuns dals dretgs umans en il mintgadi, e quai cun occurrenzas e cun acziuns. In'attenziun speziala vulan ils dis d'acziun dar quest onn al tema central "violenza envers persunas attempadas".

Violenza a chasa e violenza envers dunnas han savens lieu en il zuppà. Cun ils dis d'acziun cunter violenza dals 25 da november fin ils 10 da december 2019 rendan differentas organisaziuns en il Grischun attent a questas furmas da violenza. Il punct da partenza dals dis d'acziun è il Di internaziunal cunter violenza envers dunnas. Ils 25 da november 2019 vegnan illuminads plirs edifizis en tut il chantun cun glisch oranscha per render visibla en moda simbolica questa furma da violenza.

Violenza envers persunas attempadas en il sectur chasan è in tema da tabu. Per motivs da loialitad cun la famiglia, per vargugna u per tema taschan bleras persunas pertutgadas. Periclitadas spezialmain èn persunas attempadas che basegnan assistenza e tgira. Maltractaments en la vegliadetgna han bleras fatschas: agressiuns verbalas, violenza psichica, negligientscha, abus finanzial, isolaziun sociala u maltractaments corporals. Perquai è la violenza envers persunas attempadas il tema central dals dis d'acziun da quest onn.

Post da coordinaziun cunter violenza a chasa
Il post chantunal da coordinaziun cunter violenza a chasa s'engascha en il Grischun per ina collavuraziun interdisciplinara e professiunala da tut las autoritads ed instituziuns ch'èn activas en il sectur da la violenza a chasa. El coordinescha ils dis d'acziun.

La violenza a chasa cumpiglia tut las acziuns da violenza corporala, sexuala, psichica u economica che vegnan avant entaifer la famiglia u la chasada u tranter conjugals u partenarias resp. partenaris anteriurs u actuals. Quai independentamain dal fatg, sche l'autura u l'autur dal delict ha u aveva il medem domicil sco la victima. Violenza a chasa è chastiabla e vegn persequitada d'uffizi. La Svizra è sa participada a la convenziun dal cussegl da l'Europa davart la prevenziun ed il cumbat cunter la violenza envers dunnas e la violenza a chasa (convenziun d'Istanbul).

Agiuntas:
- flyer dal program dals dis d'acziun cunter violenza 2019
- flyer dal program da l'occurrenza publica dals 26 da november 2019


Infurmaziuns:

- Susanna Gadient, manadra da l'uffizi dal servetsch social, tel. 081 257 26 51, e-mail Susanna.Gadient@soa.gr.ch
- Sarah Huder, post da coordinaziun cunter violenza a chasa, tel. 081 257 26 11, e-mail Sarah.Huder@soa.gr.ch


Gremi: uffizi dal servetsch social
Funtauna: rg uffizi dal servetsch social
Neuer Artikel