Zum Seiteninhalt

Communicaziun da la regenza dals 5 da december 2019

  • Erste Mitteilung
  • Neuen Beitrag einfügen

La regenza ha concedì ina contribuziun chantunala per sviluppar vinavant la clinica spezialisada per malsognas secundaras da stress a Susch. Ultra da quai ha ella garantì contribuziuns pauschalas or dal fond da sport a differentas federaziuns ed organisaziuns grischunas da sport.

Contribuziun chantunala per sviluppar vinavant la clinica spezialisada per malsognas secundaras da stress

Ensemen cun la confederaziun sustegna la regenza l'ulteriur svilup da la Clinica holistica Engiadina a Susch. Per quest intent ha ella deliberà ina contribuziun chantunala da var 348 000 francs sco prestaziun equivalenta a l'emprest federal (1,5 milliuns francs) en il rom da la nova politica regiunala.

Il project d'investiziun permetta d'eliminar la mancanza da chombras per pazientas e pazients, da locals da terapia e da biros. En l'immobiglia acquistada da nov resultan 16 novs locals da biro, 5 fin 6 novs locals da terapia, ina halla da raiver e localitads per la terapia da cumbatter cun bastuns sco er per il tir cun l'artg terapeutic. En l'edifizi principal pon vegnir transfurmads 8 fin 10 locals da biro en chombras per pazientas e pazients. Ils custs da las lavurs da planisaziun e da renovaziun importan circa 4,5 milliuns francs.

-
©Clinica Holistica Engiadina SA

Contribuziuns or dal fond da sport

La regenza ha garantì contribuziuns pauschalas or dal fond da sport a las commembras ed als commembers da la federaziun da tetg dal sport grischun. Cun questas contribuziuns duai vegnir promovida la lavur generala da federaziun e d'uniun. A tut en tut 45 federaziuns ed organisaziuns da sport vegn concedida – sco l'onn precedent – ina summa totala dad 1 milliun francs.

Da quest sustegn or dal fond da sport profiteschan tut en tut var 42 800 persunas creschidas e 21 600 uffants e giuvenils. Da nov survegnan ina contribuziun finanziala er las represchentantas ed ils represchentants da las disciplinas da sport cheerleading e voltischar. Il pli grond augment da commembras e commembers ha gì l'onn passà l'associaziun grischuna da gimnastica cun totalmain 274 novas commembras e novs commembers.

-
©Voltigeverein Raetus, Scharàns


Gremi: regenza
Funtauna: rg chanzlia chantunala dal Grischun

Neuer Artikel