Cuntegn da la pagina

Quatter vischnancas engiadinaisas surdattan lur incumbensas polizialas a la polizia chantunala

  • Erste Mitteilung
  • Neuen Beitrag einfügen

Per las vischnancas da S-chanf, da Val Müstair e da Zernez surpiglia da nov la polizia chantunala dal Grischun las incumbensas polizialas. Ultra da quai vegn renovà il contract cun la vischnanca da Samignun. Quai è in ferm signal da l'Engiadina per laschar ademplir las incumbensas polizialas en moda cumplessiva.

Las radunanzas communalas da las vischnancas da S-chanf, da Val Müstair e da Zernez han concludì l'atun 2019 da surdar las incumbensas da la polizia communala a la polizia chantunala dal Grischun. Cun surdar las incumbensas da la polizia communala fan las vischnancas in pass ch'è orientà vers il futur. Oz èn vegnids suttascrits ils contracts correspundents cun il chantun. Ultra da quai ha la vischnanca da Samignun renovà ses contract. Per il chantun Grischun è la conclusiun da quests contracts in signal impurtant per la buna collavuraziun da la polizia chantunala cun las vischnancas e per la preschientscha da la polizia chantunala en tut il chantun. 

Repartiziun da las incumbensas e francaziun en las regiuns
Las vischnancas èn responsablas per la polizia da segirezza sin lur territoris communals. Ultra da quai adempleschan ellas incumbensas da basa da la polizia administrativa che las vegnan attribuidas da la legislaziun speziala. Questas incumbensas pon vegnir surdadas per contract a la polizia chantunala dal Grischun. Tenor la lescha da polizia ademplescha la polizia chantunala dal Grischun en spezial las incumbensas da la polizia giudiziala e da la polizia da traffic, cun excepziun da la regulaziun dal traffic sin vias communalas, sco er la gronda part da l'agid uffizial e da l'agid d'execuziun. Resalvadas exclusivamain a la polizia chantunala èn la protecziun dal stadi sco er l'applicaziun da mesiras repressivas polizialas.

La populaziun percepescha la polizia chantunala dal Grischun cun sias patruglias e cun la francaziun en tut il chantun en emprima lingia sco organ polizial. Pervia da quai survegn il chantun Grischun cun la conclusiun da quests contracts er la confidenza da las quatter vischnancas sco partenari fidà.

Fotografia agiuntada:

-

Il cusseglier guvernativ Peter Peyer, ils represchentants da las autoritads sco er il cumandant da polizia Walter Schlegel a chaschun da la suttascripziun dal contract en il chastè Planta-Wildenberg a Zernez 

Preschentaziun da las incumbensas polizialas



Infurmaziuns:
- cusseglier guvernativ Peter Peyer, schef dal departament da giustia, segirezza e sanadad, tel. 081 257 25 01, e-mail Peter.Peyer@djsg.gr.ch
- colonel Walter Schlegel, cumandant da la polizia chantunala, tel. 081 257 79 50, e-mail Walter.Schlegel@kapo.gr.ch


Gremi: regenza
Funtauna: rg departament da giustia, segirezza e sanadad

Neuer Artikel