Zum Seiteninhalt

La regenza ha avert la consultaziun tar la revisiun parziala da la lescha introductiva tar il cudesch civil svizzer dal chantun Grischun

  • Erste Mitteilung
  • Neuen Beitrag einfügen

La regenza ha avert la consultaziun tar il sboz d'ina revisiun parziala da la lescha introductiva tar il cudesch civil svizzer dal chantun Grischun (LItCCS) en il sectur da la protecziun d'uffants e da creschids. Tras questa revisiun parziala duai la structura organisatorica da las autoritads per la protecziun d'uffants e da creschids (APUC) vegnir adattada a las enconuschientschas fatgas dapi la realisaziun dal nov dretg da la protecziun d'uffants e da creschids dal 1. da schaner 2013.

En reguard organisatoric prevesa il sboz da la lescha da concepir la APUC da nov sco autoritad chantunala unica cun filialas regiunalas. In punct central da questa reorganisaziun è quel da mantegnair la francaziun vertenta en las regiuns sco er la cumposiziun interdisciplinara da l'autoritad er en las filialas.

Nizzegiar sinergias

Tras la creaziun d'ina unica APUC cun filialas èsi – cuntrari ad oz – pussaivel da trair a niz sinergias en l'entir chantun. En reguard giuridic material è vegnida examinada en spezial l'enumeraziun legala da las decisiuns che tutgan a la cumpetenza singula da la commembra u dal commember da l'autoritad che maina la procedura. Uschia è l'enumeraziun vegnida adattada a las experientschas dals ultims onns.

Meglierar l'interfatscha

Tras la midada da la lescha duai plinavant vegnir reglada cleramain l'interfatscha existenta tranter la APUC e las vischnancas. L'adossament e la surpigliada dals custs da mesiras en general sco er l'examinaziun da la surpigliada dals custs duain vegnir precisads. En il rom da questa revisiun èsi ultra da quai pussaivel d'adattar il dretg chantunal al dretg federal, ch'è vegnì midà en il fratemp.

La revisiun parziala duai entrar en vigur il 1. da schaner 2022. La consultaziun dura dals 13 da schaner 2020 fin ils 14 d'avrigl 2020. Ils documents respectivs pon vegnir consultads sin las paginas d'internet dal chantun e dal departament da giustia, segirezza e sanadad.


Infurmaziuns:
cusseglier guvernativ Peter Peyer, schef dal departament da giustia, segirezza e sanadad, tel. 081 257 25 01, e-mail Peter.Peyer@djsg.gr.ch


Gremi: regenza
Funtauna: rg chanzlia chantunala

Neuer Artikel