Cuntegn da la pagina

Tests da las sirenas mesemna, ils 5 da favrer 2020

  • Erste Mitteilung
  • Neuen Beitrag einfügen

Mesemna, ils 5 da favrer 2020, han lieu en tut la Svizra ils tests annuals da las sirenas "alarm general" a las 13.30 ed a las 13.45 sco er "alarm d'aua" a las 14.15 ed a las 15.00. Quests tests da las sirenas servan d'ina vart a controllar la prontezza da funcziun da las sirenas, e da l'autra vart po la populaziun emprender d'enconuscher ils differents signals d'alarm, cun ils quals ella vegn alarmada en cas d'in privel acut.

1. Alarm general 

Il "alarm general" vegn dà a las 13.30. Las sirenas vegnan messas en funcziun tras in telecumond davent da la centrala d'acziuns da la polizia chantunala a Cuira. Il "alarm general" è in tun urlant ch'è regularmain aut e bass e che dura ina minuta. Quest alarm sa repeta entaifer 5 minutas ina segunda giada. I na ston betg vegnir prendidas mesiras da cumportament e da protecziun.

A las 13.45 vegnan tut las sirenas messas en funcziun anc ina giada a maun davent da las vischnancas al lieu.

2. Alarm d'aua 

Il "alarm d'aua" vegn mess en funcziun en l'intschess da stabiliments d'accumulaziun a las 14.15 ed a las 15.00. I sa tracta d'in tun bass interrut regularmain che dura 6 minutas. I na ston betg vegnir prendidas mesiras da cumportament e da protecziun. Ils plans da fugia en cas d'in alarm d'aua pon vegnir consultads tar las vischnancas che sa chattan en il territori da deflussiun dals stabiliments d'accumulaziun.

3. Tge èsi da far, sch'i dat in dretg alarm da sirenas?

Sch'il alarm general resuna ordaifer il test da las sirenas annunzià, vul quai dir ch'ina periclitaziun da la populaziun è pussaivla. En quest cas duai la populaziun tadlar radio u s'infurmar sur ils chanals dad alertswiss, suandar ils avis da las autoritads ed infurmar las vischinas ed ils vischins. L'alarm d'aua inditga che la populaziun che viva sut in stabiliment d'accumulaziun è periclitada directamain. En quest cas duai la populaziun bandunar immediatamain il territori periclità.

Tras ils novs servetschs dad alertswiss po la populaziun en Svizra sa preparar meglier per catastrofas e per situaziuns d'urgenza e surpigliar meglier l'atgna responsabladad. L'app dad alertswiss datti gratuitamain per Android e per iOS. Ella po vegnida chargiada giu da Google Play u dal App Store.


Ulteriuras infurmaziuns e reglas da cumportament chattais Vus sin la pagina d'internet da l'uffizi federal da protecziun da la populaziun (UFPP), sin la pagina d'internet dad alertswiss sco er en il teletext dals emetturs dad SRG SSR, sin las paginas 680 e 681


Infurmaziuns:

Jürg Mayer, manader da la protecziun civila, ovras da protecziun, tel. 081 257 35 46, e-mail Juerg.Mayer@amz.gr.ch



Gremi: uffizi da militar e da protecziun civila
Funtauna: rg uffizi da militar e da protecziun civila

Neuer Artikel