Navigaziun principala

Cuntegn da la pagina

Actualisà il Concept directiv per las bibliotecas dal Grischun

  • Erste Mitteilung
  • Neuen Beitrag einfügen

La Cumissiun da biblioteca dal chantun Grischun ha revedì il "Concept directiv Bibliotecas Grischun" da l'onn 2000 ed adattà quel a las pretensiuns actualas envers las bibliotecas. Da nov èn numnads en il concept directiv trais puncts centrals da svilup: digitalisaziun, colliaziun en ina rait e biblioteca sco lieu d'inscunter. Cun perspectivas cleras per ina promoziun effizienta da las bibliotecas permetta il concept revedì da rinforzar la cuntrada da bibliotecas en il Grischun.

Il concept directiv signalisescha che spezialmain las bibliotecas duain giugar – ultra d'autras instituziuns culturalas – ina rolla impurtanta en il chantun. En il Concept davart la promoziun da la cultura 2020 vegni accentuà che las bibliotecas permettan a tut ils circuls da la populaziun en il chantun Grischun d'acceder a purschidas ed ad activitads culturalas. Il medem pretenda in dals trais puncts centrals dal Concept directiv Bibliotecas Grischun: las bibliotecas duain esser in lieu d'inscunter.

Purschidas coordinadas

Il "Concept directiv Bibliotecas Grischun" mussa las cumpetenzas da las bibliotecas, da las vischnancas e dal chantun en ils fatgs da biblioteca dal Grischun. El duai vegnir utilisà sco ina part integrala da la politica da furmaziun e da la politica culturala dal chantun Grischun e da las vischnancas. Las 65 bibliotecas en il Grischun coordineschan lur purschidas e lur servetschs e furman raits per trair a niz sinergias e per sviluppar novas purschidas confurmas als basegns. Ils fatgs da biblioteca sa midan cuntinuadamain er en il Grischun, tant en l'administraziun da las bibliotecas sco er areguard lur purschida. In ulteriur punct central dal Concept directiv Bibliotecas Grischun è perquai quel da far avanzar il diever da novas tecnologias en las bibliotecas per tegnair quint dals basegns da la societad.

Il concept directiv fixescha standards

Ils ultims onns ha il "Concept directiv Bibliotecas Grischun" promovì il svilup e la furmaziun da standards en las bibliotecas publicas dal chantun. Cun quests standards èn vegnidas cuntanschidas l'extensiun da las uras d'avertura da las bibliotecas, ina moda da lavurar unitara, la renconuschientscha da la lavur da las collavuraturas e dals collavuraturs da las bibliotecas, l'impurtanza da la biblioteca en las vischnancas ed en blers lieus ina collavuraziun pli stretga cun las scolas. Tut quests success sa fan valair er en ina meglra utilisaziun da las bibliotecas.

Cun la fundaziun dal portal grischun biblio.gr, la colliaziun da catalogs da las bibliotecas communalas e da scola, è vegnì cuntanschì l'onn 2014 in term impurtant en la cuntrada da bibliotecas en il Grischun. Tut en tut sa participeschan 33 bibliotecas a quest portal che metta a disposiziun in pool cuminaivel da datas da 317 213 medias.

En il futur vegn il "Concept directiv Bibliotecas Grischun" examinà regularmain. El serva a las bibliotecarias ed als bibliotecaris en il chantun Grischun sco instrument envers instituziuns localas, regiunalas e chantunalas.


Agiunta:

Las bibliotecas da scola e communalas  


Infurmaziuns:

Petronella Däscher, bibliotecaria chantunala, Biblioteca chantunala dal Grischun, tel. 081 257 28 21, e-mail Petronella.Daescher@kbg.gr.ch


Gremi: Uffizi da cultura
Funtauna: rg Biblioteca chantunala dal Grischun

Neuer Artikel