Navigation

Inhaltsbereich

  • Erste Mitteilung
  • Neuen Beitrag einfügen

Scolinas, scolas primaras, scolas spezialas, canortas d'uffants e d'uffants pitschens sco er geniturs da di en il chantun Grischun tgiran vinavant ils uffants che na pon betg vegnir tgirads a chasa. Il chantun ha relaschà directivas correspundentas per realisar l'ordinaziun dal Cussegl federal. La purschida da tgira ch'è vegnida installada a curta vista per questa emna vegn pia manada vinavant, gruppas da gieu percunter vegnan serradas.

Famiglias grischunas che na pon betg tgirar sezzas lur uffants durant la pausa da l'instrucziun da preschientscha ch'è vegnida ordinada, pon vinavant far quint cun ils servetschs da scolas, scolinas, canortas d'uffants e d'uffants pitschens sco er da geniturs da di. La Regenza ha concludì ch'ils purtaders da la scola populara e da la tgira d'uffants cumplementara a la famiglia stoppian mantegnair ina purschida da tgira.

La purschida sa drizza a geniturs che n'han betg ina pussaivladad privata da tgirar sezs lur uffants u che stuessan laschar tgirar els da persunas ch'èn periclitadas fermamain dal virus. Periclitadas spezialmain èn persunas a partir da 65 onns e persunas che han ina pressiun dal sang auta, diabetes, malsognas dal cor e da la circulaziun, malsognas cronicas da la via respiratorica, cancer u in sistem d'immunitad flaivlentà.

Las famiglias na vegnan betg laschadas sulettas en questa situaziun
Da princip duessan ils geniturs empruvar tut per tgirar sezs ils uffants. Nua che quai n'è betg pussaivel, surpiglian la scolas popularas grischunas e purschiders da la tgira d'uffants cumplementara a la famiglia questa incumbensa. La situaziun speziala, en la quala noss pajais sa chatta, è per bleras famiglias ina gronda chargia. Il chantun na las lascha betg sulettas en questa situaziun extraordinaria. Igl è enormamain impurtant ch'ils uffants sajan tgirads bain, ma na vegnian betg en contact cun lur nonas e nons, tattas e tats, autras senioras e seniors, umans malsauns u umans cun in sistem d'immunitad flaivlentà. Ultra da las scolas e da las scolinas giogan en quest connex er canortas d'uffants e d'uffants pitschens sco er geniturs da di ina rolla impurtanta.

Las gruppas da gieu dal chantun Grischun na fan betg part da questa regulaziun. Ellas èn bain ina purschida impurtanta da la scolaziun tempriva. Lur finamira n'è però betg quella da garantir ch'ils geniturs possian ir a lavurar. Pia na valan ellas betg sco canortas d'uffants tenor las mesiras dal Cussegl federal per cumbatter il coronavirus e vegnan serradas pervia da quai.

 Infurmaziuns

Per ulteriuras infurmaziuns per mauns da la populaziun renviescha il chantun Grischun a la suandanta pagina d'internet: www.gr.ch/coronavirus

Per dumondas generalas per telefon stat a disposiziun a la populaziun da lingua tudestga la lingia d'infurmaziun da l'Uffizi federal da sanadad publica:
Telefon: +41 58 463 00 00 (mintga di, di e notg)


Infurmaziuns per las collavuraturas ed ils collavuraturs da las medias, per il sectur da sanadad, per las vischnancas e per las scolas
Dumondas pon vegnir drizzadas er vinavant directamain al post da communicaziun per il coronavirus:

-

Uras da manaschi: glindesdi fin venderdi da las 08.00 a las 17.00

E-mail medias: kfsmedien@amz.gr.ch  
E-mail sectur da sanadad: kfsmedical@amz.gr.ch  
E-mail vischnancas, scolas & lavur: kfsinfo@amz.gr.ch  
Telefon: +41 81 254 16 00 (gli – ven, 8.00 – 19.00)



Gremi: Regenza
Funtauna: rg Chanzlia chantunala
Neuer Artikel