Cuntegn da la pagina

Il provediment da la sanadad en il chantun è anc adina garantì

  • Erste Mitteilung
  • Neuen Beitrag einfügen

Il Cussegl federal ha concludì oz da permetter als chantuns da restrenscher u da sistir per in curt temp l'activitad da tschertas branschas economicas en il cumbat cunter il coronavirus, sche la situaziun epidemiologica pretenda quai. Quai dentant mo sut premissas severas. Per la Regenza n'èn questas premissas actualmain ademplidas en naginas regiuns dal chantun. Ella vegn dentant a giuditgar permanentamain da nov la situaziun, en spezial en las regiuns Moesa e Bernina.

La Regenza sustegna la tenuta dal Cussegl federal ch'i duain valair en la situaziun extraordinaria en l'entira Svizra las medemas reglas respectivamain excepziuns cleramain definidas. En il center da tut las stentas stattan la protecziun da la sanadad da la populaziun ed il mantegniment dal provediment da la sanadad en tut las regiuns da la Svizra. Tenor l'ordinaziun adattada dal Cussegl federal duain excepziuns esser pussaivlas mo per in curt temp e mo en cas motivads tenor reglas severas. Uschia èsi garantì che chadainas da producziun impurtantas na vegnian betg interruttas en moda nuncoordinada.

Las adattaziuns da l'ordinaziun, che valan a partir da mesanotg, pretendan – per excepziuns – cumulativamain las suandantas premissas, per ch'il Cussegl federal possia permetter ina dumonda correspundenta:

  • Er suenter il sustegn tras auters chantuns n'ha il chantun betg avunda capacitads en il provediment da la sanadad.
  • Las branschas pertutgadas n'èn cun gronda probabilitad betg en cas da realisar las mesiras da prevenziun pretendidas.
  • Ils partenaris socials acceptan las mesiras previsas, suenter ch'els èn vegnids tadlads.
  • Il provediment da la populaziun cun rauba dal basegn quotidian ed il provediment da las instituziuns da sanadad sco er da lur manaschis da furniziun restan garantids.
  • La funcziunalitad da las branschas economicas pertutgadas è restrenschida, perquai che las cunfinarias ed ils cunfinaris mancan.

Actualmain n'ademplescha ni l'entir chantun Grischun ni ina singula regiun questas premissas. Il provediment da la sanadad en il chantun è garantì. La Regenza observa dentant d'in cuntin la situaziun. Il Stab directiv chantunal preschenta mintga di in rapport da situaziun per tut las regiuns. En la regiun Moesa hai pudì vegnir constatà che numerus plazzals èn vegnids serrads. Il chantun vegn plinavant ad augmentar sia activitad da controlla en tut las regiuns.

Observar strictamain las reglas, dumagnar cuminaivlamain la crisa
La Regenza appellescha anc ina giada instantamain d'observar en mintga cas tut las reglas da cumportament, en spezial tegnair distanza e restar a chasa. Gruppas da passa tschintg persunas èn scumandadas. La Regenza supplitgescha er las possessuras ed ils possessurs d'abitaziuns secundaras da restrenscher lur mobilitad e da gidar da betg engrevgiar sche pussaivel las infrastructuras da sanadad en il chantun, en spezial er en las vals dal sid.

La crisa actuala vegn anc a durar emnas. La Regenza engrazia a la populaziun ed als giasts per la chapientscha e per la solidaritad. Mo cuminaivlamain sa lascha dumagnar questa crisa.


Infurmaziuns:
cusseglier guvernativ Peter Peyer, schef dal Departament da giustia, segirezza e sanadad, tel. 081 257 25 01, e-mail Peter.Peyer@djsg.gr.ch  


Gremi: Regenza
Funtauna: rg Chanzlia chantunala

Neuer Artikel