Cuntegn da la pagina

Agid e sustegn en cas da violenza en la lètg, en il partenadi ed en la famiglia

  • Erste Mitteilung
  • Neuen Beitrag einfügen

La situaziun actuala cun mesiras cunter la derasaziun dal coronavirus po chaschunar conflicts e provocar violenza en relaziuns ed en famiglias. Las persunas pertutgadas n'èn betg sulettas. Violenza a chasa è scumandada e n'è betg ina chaussa privata. En il Grischun porschan differents posts agid, protecziun e cussegliaziun. Questas purschidas da cussegliaziun e da sustegn stattan a disposiziun er vinavant a persunas pertutgadas. Cun il slogan "HAJAS CURASCHI!" duain las persunas pertutgadas vegnir encuraschadas da tschertgar agid e sustegn. Pli baud ch'ellas fan quai, e meglier ch'igl è.

En la situaziun actuala pon la malsegirezza e la mancanza d'alternativas en l'atgna abitaziun provocar conflicts en relaziuns ed en famiglias sco er chaschunar violenza a chasa. Il chantun s'engascha er vinavant activamain cunter la violenza a chasa. En il Grischun survegnan persunas pertutgadas agid, protecziun e cussegliaziun tar differents posts. Violenza a chasa è scumandada. La polizia prenda encunter annunzias e procura immediatamain per protecziun e per agid en cas d'urgenza. L'Agid a victimas sustegna dunnas, umens, uffants e giuvenils ch'èn pertutgads da violenza en dumondas persunalas e giuridicas. Per dunnas e per lur uffants, che n'èn betg pli segirs en l'agen dachasa, pon vegnir intermediads alloschis da protecziun. Persunas violentas e persunas che teman da daventar violentas pon sa drizzar al Post da cussegliaziun per persunas violentas. La protecziun, l'agid ed il sustegn per persunas pertutgadas da violenza a chasa è e resta garantida en il Grischun er durant ils temps da corona.

La violenza a chasa ha bleras fatschas
La violenza a chasa ha bleras fassettas e n'enconuscha nagins cunfins, ni en reguard geografic e cultural ni areguard ils conturns socials, las furmas e la dimensiun. Cumpigliadas vegnan tut las acziuns da violenza corporala, sexuala, psichica u economica che vegnan avant entaifer la famiglia u la chasada ubain tranter conjugals u partenarias resp. partenaris anteriurs u actuals. Independentamain dal fatg, sche l'autura u l'autur dal delict ha u aveva il medem domicil sco la victima. Violenza a chasa sa mussa en spezial en relaziuns da partenadi, en situaziuns da separaziun, sco violenza da geniturs envers uffants u en il ravugl da la famiglia envers persunas attempadas. "AVRA ILS EGLS!", "HAJAS CURASCHI!": las purschidas da cussegliaziun e da sustegn stattan a disposiziun er vinavant a persunas pertutgadas.

Agiuntas:
Quests posts porschan agid en il Grischun
Logo "HAJAS CURASCHI!"

-Infurmaziuns:

- Susanna Gadient, manadra da l'Uffizi dal servetsch social, tel. 081 257 26 51, e-mail Susanna.Gadient@soa.gr.ch
- Sarah Huder, Post da coordinaziun cunter violenza a chasa, tel. 081 257 26 11, e-mail Sarah.Huder@soa.gr.ch


Gremi: Uffizi dal servetsch social
Funtauna: rg Uffizi dal servetsch social

Neuer Artikel