Cuntegn da la pagina

La Regenza ha avert la consultaziun concernent l'elecziun da derschadras e derschaders extraordinaris

  • Erste Mitteilung
  • Neuen Beitrag einfügen

La Regenza ha deliberà il sboz d'ina revisiun parziala da la Lescha davart l'organisaziun giudiziala per la consultaziun. Qua tras duai vegnir stgaffida la pussaivladad da rinforzar temporarmain las dretgiras grischunas tras l'elecziun da derschadras e derschaders extraordinaris.

Actualmain n'enconuscha il dretg grischun nagin mecanissem che permetta d'augmentar temporarmain il dumber da plazzas da derschadras e derschaders a la Dretgira chantunala u a la Dretgira administrativa, sch'ina derschadra u ina derschader manca previsiblamain durant plirs mais u sche la chargia da lavur è extraordinariamain gronda. En la sessiun da zercladur 2019 ha il Cussegl grond incumbensà la Regenza d'elavurar ina proposta per serrar questa largia en la lescha.

Premissas per l'elecziun da derschadras e derschaders extraordinaris
L'elecziun da derschadras e derschaders extraordinaris è in instrument extraordinari che serva a cuvrir in basegn supplementar temporar da derschadras e derschaders a las dretgiras grischunas. Tenor la proposta da la Regenza duai ina tala elecziun supplementara esser pussaivla d'ina vart, sch'ina derschadra u in derschader è previsiblamain impedì durant plirs mais d'exequir l'uffizi pervia da la restricziun da la sanadad corporala, spiertala u psichica u per auters motivs persunals. Da l'autra vart duain derschadras e derschaders extraordinaris pudair vegnir elegids per maximalmain 2 onns, sch'ina dretgira n'è uschiglio betg pli en cas da liquidar dispitas giuridicas entaifer in termin adequat u sch'igl è da temair ch'in tal stadi resultia pervia d'in augment extraordinari da la chargia da lavur.

Grazia a l'instrument da l'elecziun supplementara duain las dretgiras grischunas pia daventar ablas d'ademplir las funcziuns giudizialas attribuidas ad ellas er en situaziuns excepziunalas entaifer in termin adequat ed en la cumposiziun previsa da la lescha. L'elecziun da derschadras e derschaders extraordinaris serva pia a realisar las garanzias da procedura fundamentalas.

Ils documents da consultaziun stattan ussa a disposiziun
La consultaziun dura dals 10 da zercladur 2020 fin ils 10 da settember 2020. Ils documents respectivs pon vegnir consultads sin las paginas d'internet dal chantun u dal Departament da giustia, segirezza e sanadad. Ultra da quai pon els vegnir empustads per telefon (tel. +41 81 257 25 16) tar il departament.


Infurmaziuns: 
cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e-mail Peter.Peyer@djsg.gr.ch


Gremi: Regenza
Funtauna: rg Departament da giustia, segirezza e sanadad

Neuer Artikel