En il rom da la Nova politica regiunala da la Confederaziun (NPR) sa participescha il chantun al project "graubündenCARD 2020" cun ina contribuziun da 500 000 francs. Las contribuziuns NPR vegnan surpigliadas mintgamai per la mesadad da la Confederaziun e dal chantun.
Cun ina cooperaziun intermanaschiala da las interpresas da teleferica dal Grischun vul la Federaziun interprofessiunala Telefericas dal Grischun dar in impuls intenziunà per promover la prevendita d'abunaments annuals. Cun cumprar in abunament annual duain las clientas ed ils clients survegnir in bon per ina u duas cartas dal di che po vegnir duvrà durant la stagiun d'enviern 2020/2021 tar tut las telefericas dal Grischun. La collavuraziun tranter las interpresas da teleferica dal Grischun duai vegnir rinforzada cun il project "graubündenCARD 2020", sperond che quai haja in effect positiv per projects e per sfidas futuras.
Sco mesiras accumpagnantas a questa acziun da bon duain vegnir elavuradas uschenumnadas "AGB corona" per las collavuraturas ed ils collavuraturs da la Federaziun interprofessiunala Telefericas dal Grischun. Cun questas cundiziuns generalas da fatschenta (AGB) vegni garantì ch'ils giasts survegnian cumpensads eventuals dis che crodan ora.

© Grischun Vacanzas

La Regenza ha approvà il project d'exposiziun per curreger la via taliana tranter la fracziun da Balamburtg, avant il sutpassadi da la N13, ed il hotel Rofflaschlucht, circa 100 meters suenter la punt sur il Rain d'Avras, Roffla. Il project prevesa tranter auter da renovar la surstructura da la via e da schlargiar il profil traversal da la via. Per quest intent ston vegnir construids numerus novs mirs da sustegn e punts a spunda. La consequenza dal schlargiament da la via è ultra da quai quella che las duas fermadas da bus en la fracziun da Balamburtg ston vegnir adattadas.
Pervia da las lavurs da reparaziun en il tunnel da Balamburtg (N13) planisadas da la Confederaziun sto quest traject da la via taliana vegnir adattà. Il project federal da plirs onns pretenda ch'in vial en il tunnel vegnia bloccà e ch'il traffic vers sid vegnia devià perquai sur la via taliana e – davent da la chavorgia da la Roffla – sur la via d'Avras. Per quest motiv surpiglia l'Uffizi federal da vias (UVIAS) cun circa 8,4 milliuns francs la part la pli gronda dals custs da totalmain circa 11,8 milliuns francs che resultan. Il chantun Grischun surpiglia circa 3,1 milliuns francs. En quels èn cuntegnids 450 000 Francs che vegnan garantids en il senn d'ina prestaziun da cumpensaziun ad ina renovaziun futura dal vegl traject en il "Verlorenes Loch" da la Viamala. Ils custs da project restants vegnan surpigliads da la vischnanca dad Andeer (adattaziun da las duas plazzas da fermada dal bus) e da las Ovras electricas dal Rain posteriur (trassé dals bischens da cabels e conducts d'aua).

La Regenza ha approvà il project "Sviament da Jenins – etappa 2" e garantì per quai a la vischnanca da Jenins ina contribuziun chantunala da maximalmain 418 000 francs. Gia ils 27 da zercladur 2017 aveva la Regenza dà glischverda per in'emprima etappa da quest project ch'è vegnida terminada en il fratemp. Il sviament da Jenins duai remplazzar en il futur l'access da la via chantunala al Alpweg tras il center dal vitg stretg da Jenins per impedir uschia transports da laina chars ed ineffizients. Ultra da quai po il center dal vitg stretg vegnir deliberà uschia dal traffic agricul e forestal che s'augmenta ed il medem mument pon vegnir evitadas situaziuns privlusas per la populaziun.
La segunda etappa dal project maina vinavant l'emprima etappa davent da la Teilerrüfe e suonda la via existenta fin a la sbuccada sin il territori da la citad da Maiavilla en il Ochsenbergweg che sa chatta curt avant la via chantunala. La via existenta vegn rinforzada e schlargiada ad ina ladezza da 3,3 meters cun in banchet da tuttas duas varts da 0,5 meters.

Ils 6 ed ils 7 d'avrigl 2019 ha gì lieu a Cuira la tschintgavla sessiun dals giuvenils dal Grischun. Durant dus dis èn var 30 giuvenils sa fatschentads activamain cun l'avegnir dal chantun Grischun. Suenter debattas detagliadas ha il plenum deliberà e surdà nov pretensiuns al president da la Regenza preschent. La Regenza ha alura prendì posiziun tar tut las propostas dals giuvenils en il rom d'ina communicaziunal comité d'organisaziun da la sessiun dals giuvenils.
En connex cun la pretensiun 3, renunzia a satgs da plastic a diever unic, a vaschella ed ad emballadis da plastic nunnecessaris, ha la Regenza empermess d'examinar pli detagliadamain mesiras per reducir l'utilisaziun da plastic a diever unic e dal littering ch'è collià cun quai.
Sco basa per questa examinaziun detagliada è ina interpresa da cussegliaziun spezialisada vegnida incumbensada da cumpilar e da valitar las experientschas ch'èn gia vegnidas fatgas en auters chantuns ed en autras citads. Ils resultats èn alura vegnids documentads en il rapport "Reducziun da rument, dumonda dal parlament da giuvenils, valitaziun da mesiras per evitar rument ed acziuns cunter il littering". La Regenza ha ussa prendì enconuschientscha da quest rapport ed ha constatà che mesiras regulatoricas per scumandar satgs da plastic e plastic da diever unic n'èn betg inditgadas sin plaun chantunal pervia da la realisabladad giuridica, pervia da la controlla, pervia da l'effect e pervia da la lavur d'execuziun. Pia stoi vegnir desistì da talas mesiras. La sensibilisaziun da la populaziun concernent il consum da resursas e concernent la mentalitad da bittar davent duai en spezial vegnir fatga en las scolas. L'Uffizi per la natira e l'ambient vegn incumbensà per quest motiv d'examinar – ensemen cun la Scola auta da pedagogia dal Grischun – pussaivladads adattadas. Ultra da quai duain vegnir endrizzads sin curts da recicladi areals per rimnar en moda separada materialias ch'èn anc utilisablas, ma che na vegnan betg pli duvradas, uschia ch'ellas stattan a disposiziun ad eventualas persunas interessadas.