Navigaziun principala

Cuntegn da la pagina

La Regenza ha relaschà ina missiva davart la fusiun da la vischnanca da Haldenstein cun la citad da Cuira

  • Erste Mitteilung
  • Neuen Beitrag einfügen

Il territori da Cuira duai vegnir engrondì per il 1. da schaner 2021 cun il territori da la vischnanca vischina da Haldenstein. Las votantas ed ils votants da Haldenstein han approvà cun in resultat fitg stretg da 253 cunter 251 vuschs il contract da fusiun a chaschun da la radunanza communala dals 22 da november 2019. La votaziun a Cuira ha gì lieu ils 9 da favrer 2020 a l'urna. La populaziun da Cuira è sa decidida cun passa 77 pertschient vuschs affirmativas cleramain d'acceptar il contract da fusiun.

La vischnanca da Haldenstein s'occupa gia daditg da la dumonda, co che sias structuras duain sa preschentar en l'avegnir. A chaschun da las radunanzas communalas èsi vegnì debattà differentas giadas davart la dumonda, sche Haldenstein duai restar ina vischnanca independenta u sch'ella duai fusiunar cun la citad da Cuira.

L'onn 2017 ha la suprastanza communala da Haldenstein fatg in pass concret e decidì da sa fatschentar pli intensivamain cun l'avegnir da la vischnanca. La populaziun è vegnida integrada activamain en quest process. Il zercladur 2018 è il Cussegl da la citad da Cuira vegnì dumandà da prender per mauns scleriments per in'eventuala fusiun da las duas vischnancas. Il cumenzament da l'onn 2019 ha la suprastanza communala da Haldenstein anc vulì examinar explicitamain ina varianta "vischnanca independenta". Ina da las lavurs principalas è stada l'elavuraziun d'ina planisaziun da finanzas per Haldenstein sco vischnanca independenta.

La votaziun davart il contract da fusiun a Haldenstein ha gì lieu ils 22 da november 2019. Cun in resultat fitg stretg da 253 cunter 251 vuschs è la radunanza communala bain frequentada sa decidida per la fusiun. Ils 9 da favrer 2020 han las votantas ed ils votants da Cuira approvà il contract da fusiun cun var 77 pertschient a l'urna.

Discussiuns a Haldenstein sco dira emprova per il vitg
Las discussiuns a Haldenstein èn stadas fitg cuntraversas, per part fitg emoziunalas. Numerusas brevs da lecturs, bleras notizias en las medias socialas e dispitas persunalas èn stadas ina dira emprova per il vitg.

Il resultat fitg stretg da la votaziun a Haldenstein mussa che las differentas occurrenzas d'infurmaziun precedentas ed ils scleriments èn stads necessaris. Las votantas ed ils votants han pudì s'infurmar pliras giadas ed uschia furmar in'opiniun fundada. Er sche la decisiun per la fusiun è stada fitg stretga, è il process respectiv vegnì preparà en moda transparenta e correcta.

Contribuziun da promoziun chantunala da 3,5 milliuns francs
La contribuziun da promoziun chantunala che la Regenza ha garantì per la fusiun da la citad da Cuira cun la vischnanca da Haldenstein importa 3,5 milliuns francs. Il Cussegl grond vegn a tractar la missiva en la sessiun d'october. Cun questa fusiun sa reducescha il dumber da vischnancas ad anc 104 per il 1. da schaner 2021.

La fusiun qua avant maun sto vegnir qualifitgada sco incorporaziun da Haldenstein en la citad da Cuira. Cuira surpiglia tut las relaziuns giuridicas da la vischnanca da Haldenstein ed il dretg municipal da Cuira mantegna sia valaivladad per la vischnanca fusiunada. Ils relaschs giuridics da Haldenstein vegnan abolids cun paucas excepziuns, cur che la fusiun entra en vigur. Cun la fusiun s'engrondescha il dumber da 36 000 persunas che vivan a Cuira per las var 1000 abitantas ed abitants da Haldenstein.


Agiunta:
missiva


Infurmaziuns:
- president da la Regenza dr. Christian Rathgeb, schef dal Departament da finanzas e vischnancas, tel. +41 81 257 32 01, e-mail Christian.Rathgeb@dfg.gr.ch
- Thomas Kollegger, manader da l'Uffizi da vischnancas, tel. +41 81 257 23 81, e-mail Thomas.Kollegger@afg.gr.ch


Gremi: Regenza
Funtauna: rg Departament da finanzas e vischnancas

Neuer Artikel