Navigaziun principala

Cuntegn da la pagina

Coronavirus: Il chantun examinescha prescripziuns per occurrenzas grondas

  • Erste Mitteilung
  • Neuen Beitrag einfügen

La Regenza ha prendì enconuschientscha da la decisiun dal Cussegl federal da puspè permetter occurrenzas grondas sut mesiras da protecziun severas. Ella vegn a preparar la procedura da permissiun ed ad examinar mesiras accumpagnantas pussaivlas per il chantun Grischun.

Occurrenzas grondas èn scumandadas fin la fin d'avust, resp. la Confederaziun ha prolungà oz quest scumond fin la fin da settember. Ussa ha il Cussegl federal decidì da puspè permetter a partir dal 1. d'october 2020 occurrenzas cun passa 1000 persunas. Valair valan dentant mesiras da protecziun severas ed ils chantuns ston dar la permissiun per las occurrenzas.

La Regenza ha prendì enconuschientscha da la decisiun dal Cussegl federal. Ella vegn ad analisar detagliadamain la decisiun e vegn a preparar la procedura da permissiun, ad examinar mesiras accumpagnantas pussaivlas, sco per exempel in'obligaziun da purtar ina mascrina, ed – uschenavant sco pussaivel – a s'accordar cun ils chantuns da la Svizra orientala.

Il chantun vegn dentant er a prender per il pled la Confederaziun e spetga ch'ella elavuria fin il cumenzament da settember – en collavuraziun cun ils chantuns – pretensiuns unitaras per la permissiun d'occurrenzas grondas. Questas pretensiuns duain valair per tut ils secturs, sco sport, cultura u religiun. Uschia duain vegnir fixadas directivas supplementaras a las mesiras da basa sco tegnair distanza u igiena. Tut tenor il svilup da la situaziun epidemiologica e tut tenor las capacitads dal contact tracing po il chantun refusar ina permissiun.

Actualmain è la situaziun stabila en il chantun Grischun cun 16 persunas en isolaziun e cun 57 persunas en quarantina. Sin nivel naziunal èn las cifras dentant puspè s'augmentadas considerablamain. Perquai vali er vinavant dad esser fitg precaut e da sa retegnair en connex cun grondas fullas da glieud.


Infurmaziuns:
cusseglier guvernativ Peter Peyer, schef dal Departament da giustia, segirezza e sanadad, tel. +41 79 629 00 85, e-mail Peter.Peyer@djsg.gr.ch


Gremi: Regenza
Funtauna: rg Departament da giustia, segirezza e sanadad

Neuer Artikel