Navigaziun principala

Cuntegn da la pagina

Agid social – uffants e giuvenils pertutgads spezialmain

  • Erste Mitteilung
  • Neuen Beitrag einfügen

L'onn 2018 han 2674 Grischunas e Grischuns retratg almain ina giada agid social economic. Quai èn circa tantas persunas sco l'onn avant. Uschia è er la quota d'agid social restada constanta tar 1,4 pertschient. Stabil è er stà il dumber d'uffants e da giuvenils che retiran agid social: quasi mintga terza persuna che retira agid social ha main che 18 onns.

Sche persunas en Svizra crodan en ina situaziun finanziala d'urgenza, pon ellas sa drizzar a l'agid social. Quel è l'ultima rait da retegnida e garantescha il minimum d'existenza, sche l'agen salari, auters agids finanzials sco daners da dischoccupaziun, rentas u stipendis na tanschan betg, sche la facultad è consumada e sche er il sustegn da persunas parentas manca. La quota da persunas dal chantun Grischun ch'èn stadas en questa situaziun e ch'èn vegnidas sustegnidas da l'agid social ha importà l'onn 2018 1,4 pertschient. La quota d'agid social dal chantun Grischun è ina da las pli bassas da la Svizra. Ella sa chatta cleramain sut la media da la Svizra da 3,2 pertschient.

Quota d'agid social en il chantun Grischun ed en Svizra, 2009 fin 2018

La quota da l'agid social è restada relativamain constanta durant ils ultims 10 onns tar circa 1,1 fin 1,4 pertschient da la populaziun dal Grischun. En moda medemamain constanta èn er sa sviluppadas las gruppas da la populaziun che crodan en ina situaziun d'urgenza: uffants e giuvenils, persunas divorziadas, persunas nubilas, persunas ch'educheschan sulettas, persunas estras sco er persunas che n'han betg in diplom da furmaziun professiunala dovran spezialmain savens agid social.

Uffants e giuvenils han ina ristga pli auta da stuair dumandar agid social
L'onn 2018 han 783 uffants e giuvenils en la vegliadetgna tranter 0 e 17 onns duvrà agid social. Uschia sa chatta la quota en il chantun Grischun en questa gruppa da vegliadetgna tar 2,5 pertschient, en l'entira Svizra tar 5,2 pertschient. Dapi l'onn 2011 è questa quota creschida (da 2,0 pertschient resp. 4,9 pertschient).

Quota d'agid social tar persunas da 0 fin 17 onns en il chantun Grischun ed en Svizra, 2011 fin 2018

La ristga da stuair dumandar agid social è spezialmain auta tar uffants en la vegliadetgna prescolara. Alura sa reducescha ella cun la vegliadetgna creschenta. Uschia importa la quota d'agid social dals uffants da 5 e 6 onns 3,3 pertschient, quella dals uffants da 7 fin 12 onns 2,9 pertschient. Tar ils giuvenils da 16 e 17 onns è la quota cun 1,4 pertschient gia cleramain pli bassa.

Quota d'agid social tenor gruppas da vegliadetgna en il chantun Grischun ed en Svizra, 2018

Tut en tut han 410 chasadas cun uffants e giuvenils duvrà agid social. Quai èn 2,3 pertschient da tut las chasadas cun uffants e giuvenils tranter 0 e 17 onns. 57,1 pertschient da questas chasadas consistan d'ina persuna creschida cun in u plirs uffants. Tar 18,5 pertschient da las chasadas sa tracti da duas persunas creschidas maridadas cun uffants e tar ulteriurs 17,6 pertschient da persunas creschidas betg maridadas cun uffants. En ils 6,8 pertschient restants da las chasadas vivan trais u dapli persunas creschidas ensemen cun persunas minorennas.

Quota d'agid social tenor caracteristicas da persunas e da chasadas en il chantun Grischun, 2018

Stgars in terz da tut ils cas pon sa deliberar da l'agid social
L'onn 2017 han 32,8 pertschient dals 1696 cas che han retratg prestaziuns pudì vegnir terminads. In cas vala sco terminà, sch'i n'è vegnì pajà ora pli nagin agid social a las persunas pertutgadas durant dapli che 6 mais. Circa 9,4 pertschient dals cas han pudì vegnir terminads, perquai che la persuna ha cumenzà ina plazza da lavur u ha pudì augmentar il pensum da lavur ed ha pudì sa distatgar da l'agid social grazia a quest salari. Quests dus indicaturs sa chattan sur la media da la Svizra (28,1 pertschient resp. 7,8 pertschient). Il sigl or da l'agid social grazia ad in meglierament da la situaziun da las entradas reussescha oravant tut a pèrs cun in u dus uffants ed a persunas tranter 26 e 35 onns. La quota da distatga è vegnida calculada per l'emprima giada, cumparegliaziuns cun ils onns precedents n'èn betg pussaivlas.

La Statistica svizra d'agid social (SAS) è ina retschertga da datas annuala che vegn realisada da l'Uffizi federal da statistica. La finamira da la statistica è quella da registrar il dumber e la structura da las persunas che retiran en Svizra agid social economic sco er prestaziuns socialas precedentas che dependan d'in basegn.


Infurmaziuns:
- Susanna Gadient, manadra da l'Uffizi dal servetsch social, tel. +41 81 257 26 51, e-mail Susanna.Gadient@soa.gr.ch
- Marc Dubach, chef da secziun Agid social da l'Uffizi federal da statistica UFS, tel. +41 58 463 65 78, e-mail Marc.Dubach@bfs.admin.ch


Gremi: Uffizi dal servetsch social
Funtauna: rg Uffizi dal servetsch social

Neuer Artikel