Las trais vischnancas da San Vittore, da Roveredo e da Grono planiseschan da construir ina via da velos da 6,6 kilometers lunghezza en la part sut da la Mesolcina. La via da velos duai vegnir manada per gronda part sin il trassé da l'anteriura lingia da viafier da Bellinzona a Mesauc, ch'è praticamain mantegnì cumplettamain sin quest traject. Cun quest trassé che fa part da la rait da basa dal traffic quotidian en il Plan sectorial Velo dal Grischun, collia la via da velos ils centers da las trais vischnancas in cun l'auter. Plinavant permetta la via da velos projectada l'access ad ina via da velos ch'il chantun Tessin ha planisà. Questa via da velos duai manar las ciclistas ed ils ciclists davent da la staziun da Castione-Arbedo fin al cunfin dal Grischun. La Regenza ha deliberà a las trais vischnancas grischunas ina contribuziun chantunala da maximalmain var 2,25 milliuns francs per il project.

La punt da San Vittore sur la Moesa vers Roveredo, a Sassello

L'hotel "Löwen" ch'è vegnì construì l'onn 1870 a l'entrada sid dal vitg da Mulegns è ina da las paucas perditgas ch'èn anc mantegnidas per gronda part da la construcziun d'hotels da pli baud en il Grischun. El renviescha al temp da fluriziun dal turissem e dal traffic da charrotschas da posta en il chantun. Ensemen cun ses edifizis accessorics ch'èn vegnids construids enturn l'onn 1897 e ch'èn mantegnids per gronda part, dat l'ensemble ina impressiun da l'impurtanza sociala, economica sco er da l'architectura locala dal manaschi d'hotel.
L'onn 2019 è l'hotel vegnì surpiglià da la Nova Fundaziun Origen. Ussa duai la chasa vegnir renovada cun quità per pussibilitar in manaschi simpel. En in'emprima fasa èsi planisà da sanar il tetg ch'è per part donnegià sco er da restaurar la fatschada inclusiv las fanestras. La Regenza ha deliberà a la Nova Fundaziun Origen ina contribuziun chantunala da maximalmain var 192 000 francs per questa emprima fasa.

 

Benjamin Hofer, fotograf, benjamin hofer zurich