Navigaziun principala

Cuntegn da la pagina

Cumissiun dal Cussegl grond per politica da stadi e strategia: acceptà bain il rapport davart l'efficacitad da la gulivaziun da finanzas e davart la revisiun parziala da la Lescha davart la gulivaziun da finanzas

  • Erste Mitteilung
  • Neuen Beitrag einfügen

La Cumissiun dal Cussegl grond per politica da stadi e strategia (CPSS) ha predeliberà la missiva da la Regenza tar l'emprim rapport davart l'efficacitad 2016–2020 da la gulivaziun da finanzas per las vischnancas grischunas e tar la revisiun parziala da la Lescha davart la gulivaziun da finanzas. La cumissiun è entrada unanimamain en il project.

En duas sesidas d'in entir di sut la direcziun dal president da la cumissiun Maurizio Michael ha la CPSS predeliberà la missiva da la Regenza tar la "gulivaziun da finanzas per las vischnancas grischunas: emprim rapport davart l'efficacitad 2016–2020 e revisiun parziala da la Lescha davart la gulivaziun da finanzas". A las sesidas èn er sa participads il president da la Regenza Christian Rathgeb sco er ina represchentanza da l'Uffizi da vischnancas. En quest connex ha la cumissiun pudì s'infurmar detagliadamain davart il sistem da la gulivaziun da finanzas e sa laschar declerar detagls dals singuls mecanissems. Davart l'effect da la gulivaziun da finanzas ha la cumissiun – sco er la Regenza – pudì trair in facit positiv.

7 milliuns dapli sco consequenza da la realisaziun da la RFFA
Cun realisar la Lescha federala davart la refurma fiscala e la finanziaziun da la AVS (RFFA) stattan a disposiziun al chantun var 7 milliuns francs da la taglia federala directa che ston vegnir repartids sin las vischnancas. En quest connex ha la Regenza proponì in mecanissem concernent las contribuziuns da gulivaziun per vischnancas cun paucas resursas tenor l'art. 6 da la Lescha davart la gulivaziun da finanzas. Quel mecanissem permetta ad ella da reducir la dotaziun minimala da questas vischnancas cun paucas resursas per stgaffir uschia ina gulivaziun per quellas vischnancas che perdan entradas fiscalas impurtantas pervia da la RFFA. Il Cussegl grond era gia s'exprimì en la sessiun da zercladur 2020 cunter ina tala proposta cun tractar l'incumbensa Kohler concernent il mecanissem per las vischnancas per cumpensar il minus d'entradas fiscalas chaschunà da la RFFA. La CPSS è ussa arrivada a la medema conclusiun e refusa unanimamain la proposta da la Regenza.

Abstrahà d'ina concretisaziun da la disposiziun davart calculaziuns sbagliadas ch'ella ha er dumandà unanimamain ha la cumissiun deliberà la revisiun parziala da la Lescha davart la gulivaziun da finanzas senza ulteriuras propostas da midada per mauns dal Cussegl grond. Quel vegn a tractar il project en la sessiun d'october 2020.

Infurmaziuns:
president da la cumissiun Maurizio Michael, tel. +41 79 798 90 92


Gremi: Cumissiun per politica da stadi e strategia
Funtauna: rg Cumissiun per politica da stadi e strategia

Neuer Artikel