Films e portatuns vegnan resguardads da la populaziun e da la perscrutaziun adina pli savens sco documents ch'èn istoricamain impurtants. Per fortuna han pudì vegnir integradas ils ultims onns differentas collecziuns sco donaziuns resp. sco deposits permanents en l'effectiv da la Biblioteca chantunala dal Grischun e rendidas accessiblas a la populaziun sur il portal da medias AV.
En il portal da medias AV da la Biblioteca chantunala sa chattan medias audiovisualas (medias AV) ch'èn vegnidas producidas en il Grischun, ma er ordaifer il chantun e che pertutgan il Grischun tras lur cuntegn u tras lur auturs. Savens pussibiliteschan questas medias in access pli direct a la cultura ed a l'istorgia locala che las medias stampadas u ellas mussan aspects documentads per cas, sco la midada da la cuntrada cultivada u la vita quotidiana en ils vitgs.
Institut autalpin Ftan – documentà quasi cumplettamain la vita en scola 1949-1971
En l'archiv da l'Institut autalpin Ftan giascheva ditg ina collecziun cun 58 rollas da film, che documenteschan quasi senza largias la vita en scola dals onns 1949 fin 1971. Ils films stretgs èn vegnids fatgs dal directur da l'institut da blers onns Max Gschwind, èn en in stadi relativamain bun ed etichettads en moda accurata. Ina copia pli veglia en ina qualitad betg archivabla ha permess da giuditgar l'effectiv cun il resultat ch'igl è vegnì decidì da digitalisar da nov ils films. Las tut en tut 20 uras material da film èn ussa cataloghisadas ed accessiblas online sur il portal da medias AV dal Grischun. Suenter la digitalisaziun vegnan las medias originalas archivadas en il magasin climatisà da la Biblioteca chantunala dal Grischun sco deposit permanent da l'Institut autalpin Ftan. Ultra da la publicaziun online sur il portal da medias AV vegnan las parts las pli interessantas, vul dir ils highlights da l'effectiv da films preschentadas a chaschun d'ina occurrenza en l'Institut autalpin Ftan (venderdi, ils 25 da settember 2020).
Er in'ulteriura collecziun da films dals conturns da l'Institut da figlias, surdada a la Biblioteca chantunala da vart privata, ha pudì vegnir digitalisada l'onn 2020. Questa collecziun consista da documents dal manaschi da scola dals onns 1930. La documentaziun unica vegn a cuntegnair uschia var 40 onns da l'istorgia da l'Institut autalpin.
Portal da medias AV dal Grischun – nov cun online-streaming
Il portal da medias AV da la Biblioteca chantunala è l'inventari interinstituziunal da films e da portatuns dal chantun. Il project ch'è vegnì lantschà en il rom dal punct central chantunal da svilup 2013–16 "Diversitad culturala e linguistica" ademplescha oz l'incarica da la Biblioteca chantunala da collecziunar las medias audiovisualas. La finamira è – ultra da la cataloghisaziun – er il mantegniment a lunga vista dals bains culturals audiovisuals dal Grischun sco er la garanzia da l'access a quests documents. Fin oz èn cataloghisads var 7000 titels en il portal da medias AV, passa la mesadad dals documents ha er pudì vegnir digitalisada. Copias digitalas pon vegnir visualisadas u tadladas sin ils computers publics da la Biblioteca chantunala. Da nov pon ellas er vegnir consultadas sur il online-streaming dal portal, premess che la Biblioteca chantunala possedia ils dretgs d'utilisaziun correspundents. Actualmain èn accessibels libramain var 600 films e documents d'audio.
La Biblioteca chantunala è il post da consultaziun per dumondas davart il mantegniment, davart la restauraziun, davart l'archivaziun sco er davart il render accessibel las medias AV. Per il deposit optimal da las medias originalas periclitadas ha la Biblioteca chantunala in magasin spezial climatisà che retardescha fermamain ils process da scadenza dals mediums purtaders. Sin plaun digital pussibilitescha l'archiv digital da lunga durada da preservar en moda professiunala las copias master digitalas.
Agiunta:
Bedeutung der Filmsammlung Hochalpines Institut Ftan
Fotografias: