Il chantun Grischun integrescha la via da Montaccio da la vischnanca da Bregaglia en la rait da vias chantunalas e la surpiglia sco proprietad e per il mantegniment. Il motiv per quai è il dumber d'abitantas e d'abitants permanents a Montaccio ch'è creschì cuntinuadamain ils ultims onns e ch'è stà durant ils ultims 3 onns permanentamain sur 30. Tenor la Lescha davart las vias dal chantun Grischun ha ina fracziun communala il dretg da survegnir in access cun ina via chantunala, sche almain 30 persunas abitan là. La via da Montaccio cumenza en il vest da Stampa tar la via da Malögia e maina l'emprim sur la punt da Castelmur a Coltura e da là davent en direcziun nordvest a Montaccio.
Percunter surpiglia la vischnanca da Bregaglia la via chantunala da colliaziun a Coltura (via da Coltura) sco proprietad e per il mantegniment. Questa via sbucca en il vitg da Stampa en la via da Malögia. La via da Coltura da 517 meters lunghezza maina sur la punt da la Maira a Stampa ed alura en direcziun vest a Coltura.

La Regenza ha approvà la dumonda ch'è vegnida inoltrada da l'instituziun purtadra da l'Academia Engiadina SA per sanar la fatschada ed il tetg plat da la Chesa Naira a Samedan. Plinavant ha ella garantì a l'Academia Engiadina ina contribuziun d'investiziun da maximalmain 1,7 milliuns francs per quai.
La chasa da scola Chesa Naira è entrada en funcziun l'onn 1997. La fatschada da l'edifizi nov è vegnida revestgida cun plattas da plattamorta natirala. Dapi che la chasa da scola è vegnida retratga n'èn vegnidas fatgas naginas renovaziuns vi da la fatschada. Ma las plattas da plattamorta natirala da format grond dal revestgiment da la fatschada demussan dapi in pèr onns donns pervia da differentas influenzas da l'ambient. Er il tetg plat da la Chesa Naira ha plirs donns. Quest tetg è vegnì construì sco areal da dimora supplementar. En connex cun la sanaziun da la fatschada èsi perquai raschunaivel da renovar er la cuvrida da la terrassa da tetg e da la cumplettar cun ina nova isolaziun. Ils custs totals per las mesiras da sanaziun importan var 2,2 milliuns francs.

La Regenza ha approvà in project per construir dustanzas en la Val Luven, in torrent en la vischnanca da Sumvitg. Sin ses curs inferiur traversa l'aual il territori d'abitadi da Rabius. In'analisa dals privels ha mussà che quest territori d'abitadi, parts da la rait da vias chantunalas ed il trassé da la Viafier retica èn periclitads d'auas grondas da la Val Luven. La Confederaziun ed il chantun sa participeschan a la finanziaziun dal project cun contribuziuns per la correcziun dals curs d'aua. La contribuziun federala importa 945 000 francs e la contribuziun chantunala 540 000 francs. Sin basa da la Lescha davart las vias vegn ultra da quai concedida ina contribuziun chantunala supplementara da var 182 000 francs per las dustanzas en la Val Luven.
En il rom dal project vegnan realisadas pliras mesiras da protecziun. Tranter auter vegn siglientada ina part da grip che sa chatta var 300 meters sur il territori d'abitadi "Prau Liung". Plinengiu èsi ultra da quai planisà da construir dus rempars da deviaziun che mainan – survart da la via sursilvana H 19 – l'aua d'inundaziun puspè enavos en il letg da l'aual. Cun duas ulteriuras mesiras architectonicas po vegnir reducì cleramain il privel che l'aual giaja sur las rivas ora en cas d'aua gronda: d'ina vart tar la plazza da chargiar laina, da l'autra vart tar il traject da l'aual a Curtins. Ils custs totals da quest project importan circa 2,7 milliuns francs.