Per il project "Eisball" cun custs d'investiziun imputabels da 42 milliuns francs ha la Regenza concedì ina contribuziun chantunala da tut en tut 5,5 milliuns francs a la citad da Cuira. Il project cumpiglia la construcziun d'ina arena per sport sin pastg e d'ina halla da trenament per sport sin glatsch en il rom da l'engrondiment dals stabiliments da sport Obere Au Cuira. Quests stabiliments da sport èn d'impurtanza chantunala sco er regiunala e s'integreschan – sco infrastructura relevanta per il sistem – en la strategia regiunala per il svilup da l'economia locala.

La revisiun parziala da la planisaziun locala che la vischnanca da Tusaun aveva concludì ils 20 d'october 2019 è vegnida approvada. Uschia vegnan stgaffidas las premissas da la planisaziun d'utilisaziun per engrondir il center da scolaziun regiunal e l'areal d'exercizi da pumpiers "Pantun". Planisadas èn novas surfatschas da deposit per containers da fieu, in corridor per in binari d'exercizi sco er surfatschas da reserva per deponer vehichels. Tras la revisiun parziala da la planisaziun locala èsi plinavant vegnì procurà che l'utilisaziun da las surfatschas anc betg surbajegiadas u sututilisadas en las zonas da lavur vegn meglierada e coordinada sin plaun regiunal.

© Comet Photoshopping ScRL, Dieter Enz

La Regenza ha approvà in project per curreger la via da Val S. Pieder sin il traject Val da Tersnaus – Sontga Catrina. Il vial da la via da colliaziun, che renda accessibla la regiun turistica da Val S. Pieder, è donnegià e defurmà sin quest traject. Plinavant è il profil traversal da la via stretg e nunsurvesaivel, e per las construcziuns artifizialas, per exempel la punt da la Val d'Uors, exista in basegn da renovaziun. En il rom dal project vegn tranter auter schlargià il vial a 6 meters, la surstructura dal trassé vegn renovada e la punt existenta vegn remplazzada tras ina punt nova. Tut en tut custa il project circa 8,1 milliuns francs.

 

En il sectur Büelentobel na correspunda la via dal Scanvetg betg pli als standards d'ozendi, uschia che la Regenza ha ussa approvà in project per curreger la via. Tranter Langwies e Litzirüti è la visibilitad manglusa tar l'access a la deponia, la punt dal Büelentobel ha donns e la geometria da la via n'ademplescha betg las normas. En il rom dal project duai tranter auter la via dal Scanvetg vegnir schlargiada a 6 meters, la punt dal Büelentobel duai vegnir remplazzada tras ina punt nova e la visibilitad tar duas vias d'access duai vegnir optimada. Ils custs totals importan circa 3 milliuns francs.

 

La Regenza ha approvà in project da la Viafier retica SA per siglientar lavinas en il territori Gotschnawang al vest da Claustra ed ha concedì ina contribuziun chantunala da 189 000 francs per quest intent. Il concept che datescha da l'onn 1987 sco er ils stabiliments per siglientar lavinas e pia per proteger la lingia da viafier en il territori Clavadürli ed Obere Rüti èn antiquads. Per segirar quest sectur duain ils bratschs girabels existents sin ils fils vegnir remplazzads tras duas pitgas fixas per siglientar lavinas.

© Sophia Demmel, Wyssen Avalanche Control AG