Navigaziun principala

Cuntegn da la pagina

Rapport interactiv davart il stadi actual dal provediment da la sanadad dal Grischun

  • Erste Mitteilung
  • Neuen Beitrag einfügen

Gia per la sisavla giada publitgescha il chantun il Rapport davart il provediment da la sanadad actual dal chantun Grischun. Da nov cumpara il rapport cumplessiv online cun chartas, tabellas e diagrams interactivs.

Sco durant ils onns precedents è il Rapport davart il provediment da la sanadad vegnì redigì dal Center per la perscrutaziun da la politica economica da la Scola auta spezialisada dal Grischun. Per l'ina dat il rapport ina survista davart il svilup dals secturs da prestaziun somatica acuta, servetschs da salvament, reabilitaziun, psichiatria, chasas da tgira, servetschs da spitex e medias e medis sco er davart il svilup dals singuls manaschis. Per l'autra pon las persunas responsablas en il provediment da la sanadad dal chantun Grischun deducir da quest rapport infurmaziuns per las decisiuns ch'ellas ston eventualmain prender.

Nova concepziun dal rapport
Da nov vegn il rapport cumplessiv mess a disposiziun online cun chartas, tabellas e diagrams interactivs sin GRimpuls. La publicaziun online permetta da publitgar pli svelt il rapport e da cumplettar permanentamain las datas. En furma stampada cumpara il Rapport davart il provediment da la sanadad mo pli quest onn, e quai en ina curta survista sco uschenumnà fegl d'infurmaziun en furma da leporello.

Il svilup adina en egl
Il Rapport da sanadad gida las persunas responsablas per la strategia e per l'operar dals furniturs da prestaziuns instituziunals sco er ils commembers da las autoritads communalas ad ademplir lur incumbensas. Uschia duain pudair vegnir prendidas decisiuns cunvegnentas per manar en moda persistenta ils manaschis e pia er per garantir a lunga vista il provediment decentral da la sanadad en il chantun.


Infurmaziuns:
cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e-mail Peter.Peyer@djsg.gr.ch


Gremi: Departament da giustia, segirezza e sanadad
Funtauna: rg Departament da giustia, segirezza e sanadad

Neuer Artikel