Navigaziun principala

Cuntegn da la pagina

Eugen Arpagaus banduna l'Uffizi per economia e turissem

  • Erste Mitteilung
  • Neuen Beitrag einfügen

Eugen Arpagaus, manader da l'Uffizi per economia e turissem, banduna l'administraziun chantunala a la fin da l'onn e surpiglia a partir dal 1. da schaner 2021 la gestiun dal nov Tecnoparc Grischun.

Eugen Arpagaus maina dapi prest 20 onns l'Uffizi per economia e turissem dal chantun Grischun. Suenter in grond engaschament durant tut quests onns è Eugen Arpagaus sa decidì da remetter la responsabladad da la direcziun da l'uffizi e da sa deditgar ad ina nova incumbensa. A partir dal 1. da schaner 2021 surpiglia el la gestiun dal Tecnoparc Grischun.

Sco manader da l'uffizi ha Eugen Arpagaus gidà decisivamain ad iniziar ed a sviluppar il Tecnoparc Grischun. Grazia a sias enconuschientschas excellentas da la politica d'innovaziun e da la cuntrada d'interpresas da la Svizra sco er grazia a sia vasta rait en l'economia ed en la politica naziunala po el – sco mainagestiun – procurar ch'il Tecnoparc possia s'etablir cun success.

La Regenza ademplescha il giavisch d'Eugen Arpagaus ed al pussibilitescha da bandunar l'administraziun gia la fin da december 2020 per surpigliar a partir dal 1. da schaner 2021 la plazza da mainagestiun dal Tecnoparc Grischun. A medem temp engrazia la Regenza per ses servetschs prestads a favur dal chantun Grischun. Uschia ha Eugen Arpagaus furnì tranter auter ina contribuziun essenziala per metter en valur cun success l'areal industrial Vial/Tuleu tras la domiciliaziun da la Hamilton Ems SA e contribuì decisivamain a la fundaziun dal nov Center da perscrutaziun per la midada dal clima ed ils privels da la natira a Tavau.

La plazza da manadra u manader da l'uffizi vegn publitgada.


Infurmaziuns:
cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 24 01, e-mail Marcus.Caduff@dvs.gr.ch


Gremi: Regenza
Funtauna: rg Departament d'economia publica e fatgs socials

Neuer Artikel