Navigation

Inhaltsbereich

  • Erste Mitteilung
  • Neuen Beitrag einfügen
La regenza ha dà glisch verda per introducir in nov studi a la Scola auta spezialisada dal Grischun. Ultra da quai ha ella ordinà la sanaziun da l'aua restanta per l'Ovra electrica Fisler SA a Poschiavo.

Nov studi "Bachelor of Science in Computational and Data Science" a la Scola auta spezialisada dal Grischun

A partir dal cumenzament da l'onn da scola 2021/22 po la Scola auta spezialisada dal Grischun (SAS Grischun) porscher il studi "Bachelor of Science in Computational and Data Science". Il studi sa posiziunescha sco studi tecnic en scienzas da datas sin basa da computers e rinforza la purschida da scolaziun da la SAS Grischun sin il champ da l'informatica. Ultra d'intermediar las pretensiuns scientificas e la metoda da perscrutaziun en il rom specific duai il studi porscher ina scolaziun orientada a l'applicaziun per la pratica professiunala. Il studi qualifitgescha las absolventas ed ils absolvents da lavurar sco data scientist, sco simulation engineer u sco software engineer. Grazia a l'introducziun da novs studis vegnan promovidas duraivlamain las finamiras da la Regenza "da rinforzar il Grischun sco lieu da furmaziun e da perscrutaziun" e "da sustegnair la transfurmaziun digitala en il chantun Grischun" dal Program da la Regenza 2021–2024.

Frau und Mann diskutieren vor Computer, der Daten zeigt

© Scola auta spezialisada dal Grischun SASGR

A partir dal cumenzament da l'onn da scola 2021/22 po la Scola auta spezialisada dal Grischun (SAS Grischun) porscher il studi "Bachelor of Science in Computational and Data Science".

La Regenza ha ordinà la sanaziun da l'aua restanta per l'Ovra electrica Fisler SA

Per l'Ovra electrica Fisler SA a Poschiavo ha la Regenza ordinà la sanaziun da l'aua restanta ch'è prescritta tras lescha per las Ovras electricas Fisler e Puntunai. Cun la disposiziun da sanaziun vegn la gestiunaria da las ovras electricas tranter auter obligada da restituir ina quantitad d'aua da dotaziun da 200 liters per secunda davent da l'indriz da dotaziun tar la tschiffada al Poschiavino. Cun las sanaziuns prescrittas dal dretg da la protecziun da las auas vegni tegni quint dals interess da las auas currentas e dals spazis da viver che dependan dad ellas. Ultra da quai ha la Regenza disponì da remplazzar l'anteriur dretg d'utilisaziun da l'aua e concedì in termin da 3onns a l'Ovra electrica Fisler SA per inoltrar ina dumonda d'approvar la concessiun.

Luftbild der Wasserfassungen des Kraftwerks in Poschiavino

© Ecowert GmbH

Per l'Ovra electrica Fisler SA a Poschiavo ha la Regenza ordinà la sanaziun da l'aua restanta ch'è prescritta tras lescha per las Ovras electricas Fisler e Puntunai.

Neuer Artikel
Gremi: Regenza
Funtauna: rg Chanzlia chantunala dal Grischun