La Regenza è s'exprimida cleramain a favur da la persistenza. En il rom d'in punct central da svilup dal Program da la Regenza 2017‑2020 (Persistenza [PS2], pagina 823) aveva ella formulà la finamira che decisiuns vegnian giuditgadas en l'avegnir meglier areguard la persistenza e che l'administraziun garanteschia per projects persistents. Concretamain pretenda quest punct central da svilup che las ideas directivas dal svilup duraivel vegnian integradas en ils projects dals departaments e dals posts da servetsch da l'administraziun chantunala cun agid d'in giudicament da la persistenza.
La Regenza ha ussa approvà in concept per quest giudicament da la persistenza e mess en vigur quel per il 1. da schaner 2021. Tenor quest concept ston ils departaments ed ils posts da servetsch mintgamai giuditgar a temp a maun da criteris prescrits, sch'in project duai vegnir suttamess ad in giudicament da la persistenza u betg. A medem temp survegnan els l'incumbensa d'integrar il giudicament da la persistenza en lur proceduras ed andaments interns. Criteris decisivs per far in tal giudicament èn la cumplexitad dal project, la purtada territoriala e temporala da las consequenzas dal project, la populaziun pertutgada, ils custs sco er eventuals conflicts d'interess. Il giudicament da la persistenza serva a valitar gia ordavant e da maniera cumplessiva las consequenzas economicas, socialas ed ecologicas d'in project ed uschia a stgaffir basas transparentas per las decisiuns.

La Regenza ha incumbensà la Scola auta da pedagogia dal Grischun (SAPGR) da sviluppar e d'introducir in studi da master "Secundar I" sin basa d'in bachelor specific. Tras la nova purschida duai la SAPGR scolar en l'avegnir las persunas d'instrucziun da tut ils stgalims da la scola populara en il chantun Grischun. Cun agid da questa purschida da scolaziun duai vegnir prestada ina contribuziun per cuvrir il basegn da persunas d'instrucziun sin il stgalim secundarI en il chantun Grischun. Il nov studi cumenza il pli baud l'atun 2022.

La Regenza ha approvà in project per curreger la via da Malögia tar la punt da l'Ova dal Vallun. Sin il traject dal project tranter Silvaplauna e Malögia ston vegnir remplazzadas plattas da la punt, perquai che quellas èn donnegiadas. A medem temp duai vegnir meglierada la segirezza en cas d'aua gronda tar la traversada da la via. La via vegn auzada en il sectur da la punt ed adattada da tuttas duas varts a la via existenta. Ils custs totals importan circa 1,4 milliuns francs.

A la Fundaziun Marlene Porsche ha la Regenza garantì ina contribuziun chantunala da maximalmain 232 300 francs per restaurar l'intern da la chasa d'abitar "Casa Guberto" a Soglio. L'edifizi d'impurtanza istorica caracterisescha considerablamain il maletg dal vitg da Soglio. El è en in bun stadi e dispona per gronda part d'ina substanza architectonica istorica. La chasa cun mirs massivs da crappa rutta e cun in tetg da plattas da crap ha sviluppà sia cumparsa actuala durant pliras fasas da construcziun. L'edifizi era vegnì construì ils onns 1554 fin 1573 per il chapitani Dietegen von Salis. L'onn 1629 han Guberto e Dorothea von Salis engrondì la chasa. En blers lieus – tant a l'extern sco er a l'intern da l'edifizi – dattan fastizs perditga da la lunga istorgia da la chasa.

 

En la votaziun dal pievel dals 27 da settember 2020 ha il suveran acceptà la cuntraproposta indirecta dal Parlament federal tar l'iniziativa dal pievel "Per in congedi da paternitad raschunaivel – a favur da tut la famiglia". Uschia vegn introducì en l'entira Svizra in congedi da paternitad pajà da duas emnas. Quest congedi po vegnir retratg entaifer sis mais suenter la naschientscha. Per il persunal da l'administraziun chantunala è il dretg dal congedi da paternitad reglà en la Lescha davart la relaziun da lavur da las collavuraturas e dals collavuraturs dal chantun Grischun (Lescha dal persunal). L'Ordinaziun respectiva dal persunal prevesa in congedi da tschintg dis da lavur. En vista al svilup dal dretg federal ha la Regenza ussa augmentà il dretg dal congedi da paternitad per il 1. da schaner 2021 medemamain sin diesch dis da lavur.