Navigaziun principala

Cuntegn da la pagina

Coronavirus: sustegn per il sectur da la cultura

  • Erste Mitteilung
  • Neuen Beitrag einfügen

Las mesiras da sustegn duain d'ina vart mitigiar las consequenzas economicas da la pandemia dal coronavirus per las interpresas culturalas. Da l'autra vart duain las interpresas culturalas survegnir sustegn per s'adattar a las novas relaziuns. Las mesiras gidan a segirar duraivlamain la cuntrada da cultura ed a mantegnair uschia la diversitad culturala.

Per quest intent ha la Regenza renovà la cunvegna da prestaziun tranter la Confederaziun svizra ed il chantun Grischun per realisar las mesiras en il sectur da la cultura ch'èn previsas en la Lescha federala COVID‑19. Vinavant ston ils sustegns vegnir finanziads mintgamai per la mesadad tras la Confederaziun e tras il chantun. Ils meds finanzials per l'onn 2020 è vegnids deliberads dal chantun. L'onn 2021 duain las mesiras da sustegn vegnir cuntinuadas, cun resalva che la Regenza e la Cumissiun da gestiun dal Cussegl grond approveschian in credit posteriur.

Indemnisaziuns da las perditas e contribuziuns da transfurmaziun
En concordanza cun las prescripziuns dal dretg federal èn previs agids finanzials betg restituibels en furma d'indemnisaziuns da las perditas. Per il donn finanzial che resulta tras l'annullaziun, tras il spustament u tras la restricziun da la realisaziun d'occurrenzas e da projects u tras restricziuns dal manaschi en consequenza da mesiras statalas, pon interpresas culturalas dumandar ina indemnisaziun da las perditas.

Da nov pon er vegnir concedidas contribuziuns a projects da transfurmaziun. Cun quellas vegnan sustegnids projects d'interpresas culturalas che han la finamira da s'adattar a las relaziuns ch'èn sa midadas pervia da corona, che prendan en mira ina nova orientaziun structurala e/u tschertgan da recuperar respectivamain da s'avrir novs segments dal public.

Indemnisaziun per lavur reducida
Interpresas culturalas pon ultra da quai dumandar ina indemnisaziun per lavur reducida. Sco lavur reducida valan er perditas da lavur che vegnan chaschunadas da mesiras uffizialas u d'autras circumstanzas che n'èn betg vegnidas influenzadas dal patrun. Perquai che las indemnisaziuns da la perdita per interpresas culturalas èn subsidiaras a las indemnisaziuns per lavur reducida, vegnan las persunas pertutgadas supplitgadas da dumandar en in emprim pass sche pussaivel ina indemnisaziun per lavur reducida.

Infurmaziuns actualas sco er ils formulars da dumonda correspundents stattan a disposiziun sin la pagina d'internet da la Promoziun da la cultura e da linguas dal Grischun.

Infurmaziuns:
Barbara Gabrielli, manadra da l'Uffizi da cultura, tel. +41 257 48 01, e‑mail Barbara.Gabrielli@afk.gr.ch


Gremi: Uffizi da cultura
Funtauna: rg Uffizi da cultura

Neuer Artikel