Navigaziun principala

Cuntegn da la pagina

A partir d'immediat pon vegnir inoltradas dumondas d'agid per cas da direzza en connex cun corona

  • Erste Mitteilung
  • Neuen Beitrag einfügen

Il chantun metta a disposiziun agids per cas da direzza ad interpresas spezialmain pertutgadas. La basa furman las mesiras per cas da direzza che la Confederaziun ha deliberà dacurt sco er l'ordinaziun executiva dal chantun. Interpresas pertutgadas pon inoltrar dumondas a partir d'immediat. Tut en tut stattan a disposiziun 38,5 milliuns francs.

Il parlament federal ed il Cussegl federal han deliberà las mesiras per cas da direzza ils 18 da december 2020. L'ordinaziun executiva respectiva dal chantun entra en vigur il 1. da schaner 2021. 

Dumondas pon vegnir inoltradas a partir d'immediat
A partir d'immediat pon interpresas pertutgadas inoltrar dumondas sur la pagina d'internet dal Departament d'economia publica e fatgs socials (www.dvs.gr.ch -> Rumantsch Mesiras per cas da direzza). Igl è fitg impurtant che las interpresas inoltreschian tut ils documents necessaris e fetschian tut las indicaziuns necessarias en il rom da la dumonda.

Interpresas autorisadas – perdita da la svieuta da 40 pertschient l'onn 2020
Dumondas per contribuziuns pon vegnir inoltradas d'interpresas cun sedia en il chantun Grischun (di da referenza: 1. d'october 2020) ch'existivan gia il 1. da mars 2020, che han ina svieuta annuala minimala da 50 000 francs e che han subì l'onn 2020 – cumpareglià cun la media dals dus onns precedents – ina reducziun da la svieuta d'almain 40 pertschient. L'indemnisaziun per lavur reducida, la cumpensaziun dal gudogn u auters agids COVID‑19 na vegnan betg quintads tar la svieuta da l'onn 2020, mabain mo gudogns da l'activitad commerziala.
Plinavant ston esser ademplids ulteriurs criteris: uschia sto l'interpresa exercitar in'activitad commerziala u occupar agen persunal en il chantun Grischun, passa 50 pertschient dals custs da salari da l'interpresa ston resultar en Svizra, l'interpresa sto avair la capacitad da surviver ed esser profitabla ed ella sto avair prendì las mesiras ch'èn necessarias per proteger sia liquiditad e sia basa da chapital.

Interpresas betg autorisadas
Interpresas, nua che la Confederaziun, il chantun u vischnancas cun passa 12 000 abitantas ed abitants èn participadas tut en tut a dapli che 10 pertschient da lur chapital na survegnan nagin sustegn. Er interpresas che han il dretg d'auters agids finanzials da COVID-19 ch'èn specifics per la branscha e che vegnan pajads da la Confederaziun en ils secturs cultura, sport, traffic public u medias n'èn da princip betg autorisadas. Sche la svieuta da l'interpresa en quests secturs è però marginala u sche las activitads d'ina interpresa èn determinadas cleramain (quint da sparta), pon tuttina vegnir concedidas contribuziuns.

Interpresas cun champs d'activitad cleramain determinads
Interpresas che han champs d'activitad cleramain determinads e che mainan in quint separà per questas spartas pon dumandar che tscherts criteris vegnian giuditgads separadamain per la sparta pertutgada. Quai vul dir che betg l'entira interpresa na sto ademplir tscherts criteris, mabain mo la sparta pertutgada. I sa tracta oravant tut dals suandants criteris: reducziun da la svieuta, custs da salari che resultan per passa 50 pertschient en Svizra, auters agids finanzials da COVID-19 ch'èn specifics per la branscha.

Autezza dal sustegn e termin d'inoltraziun
Il sustegn ha lieu en furma da contribuziuns betg restituiblas. El è limità a maximalmain 500 000 francs per interpresa u a 10 pertschient da la svieuta mesauna dals onns precedents. 

Dumondas pon vegnir inoltradas fin ils 30 d'avrigl 2021.

Ulteriuras infurmaziuns sco er il formular da dumonda stattan a disposiziun qua.


Infurmaziuns:

Bruno Maranta, secretari dal Departament d'economia publica e fatgs socials, e‑mail Bruno.Maranta@dvs.gr.ch 


Gremi: Departament d'economia publica e fatgs socials
Funtauna: rg Departament d'economia publica e fatgs socials

Neuer Artikel