Navigaziun principala

Cuntegn da la pagina

Ils territoris da skis restan averts – la vaccinaziun cumenza sco previs ils 4 da schaner en las chasas da persunas attempadas

  • Erste Mitteilung
  • Neuen Beitrag einfügen

Ils territoris da skis en il Grischun pon restar averts vinavant; la situaziun epidemiologica en il chantun permetta quai. A partir dals 31 da december conceda la Regenza als manaschis da gastronomia en ils territoris da skis emprimas facilitaziuns en il sectur da take-away: ins dastga puspè duvrar las terrassas ed il scumond da consumar alcohol sin las pistas da skis vegn abolì dumengia, ils 3 da schaner 2021, a las 24.00. En il chantun vegni cumenzà ils 4 da schaner 2021 cun la vaccinaziun da persunas spezialmain periclitadas en las chasas da persunas attempadas.

Las mesiras relaschadas dal chantun e da la Confederaziun fan effect: il dumber da las persunas isoladas (612) è puspè sa diminuì. Sa diminuids èn medemamain il dumber da las novas infecziuns per di e per emna sco er la cifra da reproducziun decisiva. Las staziuns intensivas èn actualmain occupadas en moda normala e n'èn betg surchargiadas. Tuttina admonescha la Regenza da betg daventar negligent; pervia dals dis da festa e pervia dal retard en connex cun ils tests e cun las annunzias èsi actualmain grev da valitar la situaziun epidemiologica.

Ils manaschis da gastronomia restan ad interim serrads
Per che l'effect ch'ins ha cuntanschì sa mantegnia, ston las mesiras vertentas vegnir realisadas vinavant senza resalvas. Uschia restan ils manaschis da restauraziun serrads sur Bumaun. La Regenza è conscienta che la branscha da gastronomia tutga actualmain tar las instanzas ch'èn pertutgadas principalmain. En il rom d'in giudicament cumplessiv examinescha ella perquai il cumenzament da schaner, sche las premissas per in'avertura èn dadas, però er co ch'igl è pussaivel da sustegnair supplementarmain la branscha.

Emprimas facilitaziuns per manaschis en territoris da skis 
Als manaschis che porschan spaisas e bavrondas en furma da take-away en ils territoris da skis, vegnan concedidas a partir dals 31 da december 2020, a las 07.00 emprimas facilitaziuns: els dastgan puspè porscher plazzas da seser or en il liber. Per maisa dastgan seser maximalmain 4 persunas e tranter las gruppas da giasts è prescritta ina distanza dad 1,5 meters. Las prescripziuns detagliadas vegnan communitgadas directamain a la branscha. Uschia sto il manaschi tranter auter engaschar ina persuna che controlla che las prescripziuns vegnian observads, che exequescha quellas e che regla la circulaziun da persunas. Igl è anc adina scumandà da sa trategnair en locals interns, danor per duvrar las tualettas sco er per entrar e sortir directamain dals implants da transport. Ils concepts da protecziun da la branscha da gastronomia ston vegnir observads en mintga cas. Il scumond da consumar alcohol sin las pistas da skis vegn puspè abolì dumengia, ils 3 da schaner 2021, a las 24.00. 

Concepts da protecziun vegnan meglierads
Las experientschas dals ultims dis mussan ch'ils giasts sa repartan bain sin las differentas purschidas en ils territoris da skis. Uschia pon vegnir evitadas gruppaziuns da glieud che augmentan la ristga d'infecziun. Là, nua che quai era necessari, han ils gestiunaris dals implants meglierà svelt lur concepts da protecziun e la realisaziun da quels. La finala ha er la limitaziun dal dumber da persunas en ils territoris da skis chaschunà ina diminuziun da las persunas preschentas. Emprovas da guntgir las reglas existentas u da profitar da las zonas giuridicas grischas, ston vegnir qualifitgadas sco acts imprudents e nunsolidarics. Ellas pericliteschan en moda considerabla eventualas schluccadas sveltas. La Regenza engrazia expressivamain a tut las interpresas responsablas che realiseschan e controllan cun gronda lavur e cun gronds custs correctamain ed exemplaricamain las prescripziuns.

Vaccinaziun cumenza ils 4 da schaner en las chasas da persunas attempadas
Sco previs vegnan fatgas las emprimas vaccinaziuns en il chantun a partir dals 4 da schaner 2021. Las vaccinaziuns vegnan fatgas tenor las prescripziuns da la Confederaziun en las instituziuns e tar las gruppas da persunas previsas per quai. Là dattan teams mobils las emprimas 2600 dosas ch'èn vegnidas assegnadas da l'Uffizi federal da sanadad publica al chantun Grischun. Questas dosas tanschan per 1300 persunas. Pervia da la disponibladad limitada dal vaccin han la preferenza il cumenzament da l'acziun da vaccinaziun las persunas spezialmain periclitadas sur 75 onns, resp. las abitantas ed ils abitants da las chasas da persunas attempadas e da tgira, il persunal da sanadad che ha contact cun pazientas e pazients ed il persunal da tgira da persunas spezialmain periclitadas. Centers da vaccinaziun e da test vegnan installads ed entran en funcziun a partir da la segunda mesadad dal schaner. Fin la fin da schaner stattan a disposiziun al chantun tut en tut var 9000 dosas dal vaccin. Las cussegliaziuns individualas da vaccinaziun pertutgan il champ da cumpetenza da las medias e dals medis da chasa. Probablamain a partir da mez schaner vegni ad esser pussaivel da s'annunziar per la vaccinaziun. L'annunzia vegn a succeder sin via electronica sur ina plattafurma svizra, ubain tras ina registraziun autonoma online ubain sur la media u il medi da chasa. Uschespert ch'igl è pussaivel da s'annunziar, vegnan publitgadas las infurmaziuns en chaussa sin la pagina d'internet dal chantun (www.gr.ch/coronavirus). 

La Regenza engrazia a la populaziun per la solidaritad e per l'observanza da las mesiras per franar la pandemia e giavischa tut il bun per l'onn nov.


Infurmaziuns: 
Post da communicaziun per il coronavirus dal chantun Grischun, e‑mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)



Gremi: Regenza
Funtauna: rg Departament da giustia, segirezza e sanadad

Neuer Artikel