Navigaziun principala

Cuntegn da la pagina

Agids per cas da direzza – interpresas dal commerzi en detagl pon inoltrar dumondas a partir d'immediat

  • Erste Mitteilung
  • Neuen Beitrag einfügen

Interpresas dal commerzi en detagl che han lur sedia en il chantun Grischun pon inoltrar a partir d'immediat ina dumonda per agids per cas da direzza. Ultra da quai vegn applitgada ina nova soluziun d'informatica.

Las commerziantas ed ils commerziants che han subì ina perdita da la svieuta en consequenza da las mesiras uffizialas durant la pandemia dal coronavirus vegnan indemnisads dal chantun cun 75 pertschient da las perditas economicas en il rom dal program per cas da direzza da la Confederaziun e dal chantun. Quai correspunda da princip a la part dals custs fixs da la perdita da la svieuta.

Interpresas dal commerzi en detagl che han stuì serrar lur fatschenta per part u dal tuttafatg tranter ils 18 da schaner 2021 ed ils 28 da favrer 2021 u che han dastgà vender mo in sortiment limità, pon inoltrar a partir d'immediat ina dumonda per sustegn.

Il medem mument vegn applitgada ina nova soluziun d'informatica che duai accelerar il process dal pajament da las contribuziuns. Cun questa nova soluziun d'informatica stat a disposiziun en il futur mo pli in unic formular da dumonda per tut las interpresas. Interpresas dal commerzi en detagl ston emplenir ina rubrica speziala en quest formular. Vi da l'elavuraziun da las dumondas tras il chantun na sa mida nagut.

Las infurmaziuns cumplettas davart ils agids per cas da direzza e las novas infurmaziuns per interpresas dal commerzi en detagl stattan a disposiziun sin la pagina d'internet dal Departament d'economia publica e fatgs socials.

Statistica davart las mesiras per cas da direzza
Stadi mesemna, ils 10 da mars 2021, 18.00 Fin ussa èn vegnidas inoltradas 479 dumondas da differentas interpresas (emna precedenta 412). Da quellas èn 227 vegnidas approvadas e 31 refusadas fin ussa. En elavuraziun èn actualmain 221 dumondas. Fin a la data menziunada èn vegnids pajads ora 15,85 milliuns francs (emna precedenta 11,75 miu.). Ulteriurs 1,27 milliuns francs èn pronts per vegnir pajads ora.


Infurmaziuns:
Post da communicaziun per il coronavirus dal chantun Grischun, e‑mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)


Gremi: Regenza
Funtauna: Chanzlia chantunala

Neuer Artikel