Navigaziun principala

Cuntegn da la pagina

Coronavirus: Indemnisaziun da las perditas er per persunas che lavuran temporarmain sin il champ cultural

  • Erste Mitteilung
  • Neuen Beitrag einfügen

Da nov pon er persunas che lavuran temporarmain sin il champ cultural dumandar agids finanzials per perditas pervia dal coronavirus. Suenter che la Confederaziun ha adattà l'Ordinaziun COVID-19 cultura, ha il chantun Grischun surpiglià l'extensiun previsa dal circul da persunas che ha il dretg da survegnir indemnisaziuns. Er las indemnisaziuns da las perditas per persunas che lavuran temporarmain sin il champ cultural vegnan finanziadas mintgamai per la mesadad tras la Confederaziun e tras il chantun.

Il Cussegl federal ha adattà ils 31 da mars 2021 l'Ordinaziun COVID-19 cultura. Cun questa chaschun ha el introducì la pussaivladad che persunas che lavuran temporarmain sin il champ cultural pon dumandar ina indemnisaziun da las perditas. I sa tracta d'agids finanzials betg restituibels. Tals sustegns n'èn fin ussa betg vegnids pajads a persunas che lavuran temporarmain sin il champ cultural.

Ils agids finanzials vegnan concedids en furma d'indemnisaziuns da las perditas per il donn finanzial che resulta dal 1. da november 2020 fin ils 31 da december 2021 tras l'annullaziun, tras il spustament u tras la restricziun da la realisaziun d'occurrenzas e da projects ubain tras restricziuns dal manaschi en consequenza da mesiras statalas.

Per l'execuziun èn vinavant responsabels ils chantuns. Per inoltrar ina dumonda ston vegnir observads en mintga cas ils termins numnads sin ils fegls d'infurmaziun.

Infurmaziuns actualas sco er ils formulars da dumonda correspundents stattan a disposiziun sin la pagina d'internet www.kfg.gr.ch > Coronavirus COVID-19


Infurmaziuns:
Barbara Gabrielli, manadra da l'Uffizi da cultura, tel. +41 257 48 01, e-mail Barbara.Gabrielli@afk.gr.ch


Gremi: Uffizi da cultura
Funtauna: rg Uffizi da cultura

Neuer Artikel