Navigation

Inhaltsbereich

  • Erste Mitteilung
  • Neuen Beitrag einfügen

Dapi ils 8 da mars èn s'annunziadas en il Grischun 15 300 persunas per ina vaccinaziun cunter il coronavirus. Durant l'emna vegnan vaccinadas en ils 9 centers da vaccinaziun var 1300 persunas per di cunter il coronavirus SARS‑CoV‑2. En il fratemp pon gia persunas a partir da 65 onns vegnir clamadas al termin da vaccinaziun. Persunas cun grevas malsognas cronicas preexistentas e persunas da 75 onns e dapli han vinavant in access prioritar a la vaccinaziun. Per pudair planisar l'ulteriur proceder da l'acziun da vaccinaziun en ils 9 centers da vaccinaziun pon sa preannunziar a partir da gievgia er las persunas da 35 fin 44 onns.

A partir dals 22 d'avrigl pon alura er las ultimas duas gruppas, las persunas tranter 25 e 34 onns e las persunas da 16 fin 24 onns, s'annunziar per la vaccinaziun en il Grischun. Ma i pon anc adina passar fin a dus mais e mez davent da l'annunzia fin a l'attribuziun dal termin da vaccinaziun.

Prioritad tenor l'entrada da l'annunzia entaifer las gruppas da vegliadetgna
Entaifer las gruppas da vegliadetgna vegnan ils termins da vaccinaziun priorisads tenor l'entrada da las annunzias. Tut en tut èn s'annunziadas gia var 50 000 persunas per ina vaccinaziun en il chantun Grischun. Passa 30 000 Grischunas e Grischuns han survegnì lur emprima vaccinaziun, var 20 000 èn immunisads cumplettamain.

Adattà las recumandaziuns da vaccinaziun per persunas che avevan COVID‑19
L'Uffizi federal da sanadad publica (UFSP) ha ultra da quai adattà las recumandaziuns da vaccinaziun per persunas che han fatg tras COVID‑19. Pervia da las enconuschientschas las pli novas vegni recumandà da nov da sa laschar vaccinar 6 mais suenter ina infecziun cumprovada cun COVID‑19 (PCR / test d'antigens). Exceptadas da quai èn persunas spezialmain periclitadas che duessan vegnir vaccinadas vinavant suenter 3 mais. Ultra da quai vegn da nov injectada mo pli ina dosa d'in vaccin mRNA, sch'ins ha fatg tras COVID‑19. In'excepziun èn las persunas cun in sistem d'immunitad supprimì u defizient.

Las infurmaziuns davart las vaccinaziuns cunter corona vegnan cumplettadas cuntinuadamain sin la pagina d'internet www.gr.ch/impfung.


Agiunta:
Plan da vaccinaziun (stadi: 9 d'avrigl 2021)


Infurmaziuns:
Post da communicaziun per il coronavirus dal chantun Grischun, e‑mail kfsmedien@amz.gr.ch


Gremi: Uffizi da sanadad
Funtauna: Chanzlia chantunala

Neuer Artikel