Navigation

Inhaltsbereich

Cun in nova legislaziun da surdada vul la Regenza cuntanscher ina pratica da cumpra pli persistenta dal maun public

  • Erste Mitteilung
  • Neuen Beitrag einfügen

La Regenza ha deliberà per la consultaziun il conclus da participaziun e la Lescha introductiva tar la nova Cunvegna interchantunala davart las acquisiziuns publicas. Las disposiziuns da surdada armonisadas cun la Confederaziun e cun ils chantuns preparan la via per acquisiziuns modernas en il chantun Grischun che tegnan quint da la persistenza, da la qualitad e da l'innovaziun. Las fermezzas da las purschidras e dals purschiders svizzers dastgassan uschia sa far valair anc pli fitg.

Las acquisiziuns publicas – en il Grischun er numnadas fatgs da submissiun – reglan in segment impurtant da l'economia publica svizra. La Confederaziun, ils chantuns e las vischnancas acquistan mintga onn prestaziuns da construcziun, furniziuns e servetschs en la valur da var 41 milliardas francs (circa 20 pertschient Confederaziun e circa 80 pertschient chantuns e vischnancas). En il chantun Grischun cun sia gronda surfatscha han las incumbensas publicas da vegl ennà ina impurtanza spezialmain gronda.

Armonisaziun naziunala da las prescripziuns d'acquisiziun
Las disposiziuns da la legislaziun da surdada en Svizra sa basan en spezial sin ina convenziun da la WTO (GPA) e sin ina cunvegna bilaterala cun la UE. Sin plaun naziunal vegnan questas disposiziuns realisadas tar la Confederaziun tras la Lescha federala davart las acquisiziuns publicas (LAP) e tar ils chantuns tras la Cunvegna interchantunala davart las acquisiziuns publicas (CIAP). Pervia da la revisiun da la convenziun da la WTO concludida l'onn 2012 che cuntegna tranter auter in meglier access al martgà per interpresas svizras da 80 fin 100 milliardas dollars americans supplementars per onn ston vegnir adattadas las prescripziuns d'acquisiziun da la Confederaziun e dals chantuns. Il medem mument duain ils cuntegns da questas prescripziuns d'acquisiziun vegnir armonisads uschenavant che quai è pussaivel e raschunaivel.

Suenter che la Confederaziun aveva relaschà sia nova LAP per ses agens posts d'acquisiziun, han ils chantuns deliberà unanimamain il november 2019 – a chaschun d'ina radunanza speziala – la revisiun totala da la CIAP. Cun quai vegn tschentà in ulteriur term impurtant sin la via ad in'unificaziun dal dretg d'acquisiziun da tut ils plauns federals da la Svizra. Cun in'atgna decleraziun pon ils chantuns ussa sa participar a la nova CIAP. En il chantun Grischun è il conclus da participaziun chaussa dal Cussegl grond.

Rinforz da la persistenza, da la qualitad e da l'innovaziunärkung der Nachhaltigkeit, Qualität und Innovation
Las finamiras principalas da la revisiun da la CIAP èn – ultra da l'armonisaziun dal dretg – la modernisaziun e la flexibilisaziun da la legislaziun da surdada. Ultra da quai persequitescha la revisiun er finamiras politicas, numnadamain da resguardar pli fitg la persistenza ecologica, sociala ed economica en cas d'incumbensas publicas, da rinforzar la concurrenza da la qualitad envers la concurrenza dals pretschs e da promover soluziuns innovativas. Er duai l'observaziun da las cundiziuns da participaziun vegnir garantida pli consequentamain ed i duai vegnir introducida ina glista centrala cun purschidras e purschiders sancziunads sco er cun interpresas secundaras sancziunadas. Ils andaments d'acquisiziun e las valurs minimalas restan da princip talas e qualas, ma blers detagls da la procedura vegnan adattads.

La CIAP regla da nov l'entir dretg da las acquisiziuns publicas. En il senn da las stentas d'armonisaziun s'orientescha il sboz da consultaziun da la Regenza fermamain al model da la lescha da participaziun dals chantuns. Questa lescha sa restrenscha a paucas disposiziuns d'execuziun e da realisaziun. Ultra da quai prendan la Confederaziun, ils chantuns e las vischnancas en mira in'execuziun uschè unitara sco pussaivel dal nov dretg d'acquisiziun ed elavuran actualmain per quest intent in mussavia cuminaivel davart las acquisiziuns sco agid pratic impurtant.

Participaziun en l'interess da las IPM svizras e dals posts d'acquisiziun publics
Las prescripziuns d'acquisiziun revedidas han differents avantatgs per ils posts d'acquisiziun communals e chantunals sco er per las purschidras ed ils purschiders. Tenor l'avis da la Regenza èsi perquai impurtant da sa participar svelt a la CIAP revedida. Ella renviescha numnadamain a la giurisdicziun unitara che sa sviluppa en Svizra, als models cuminaivels per l'applicaziun dal dretg en la pratica sco er als meds d'instrucziun unitars che stattan a disposiziun ed a las scolaziuns e furmaziuns supplementaras ch'èn accordadas cun quai. Ultra da quai furman las disposiziuns da surdada revedidas da nov in rom giuridic per utilisar proceduras d'acquisiziun modernas che sa basan sin l'electronica e che porschan tendenzialmain dapli libertad d'agir per evaluar la purschida la pli favuraivla.

Da la vart da las purschidras e dals purschiders dastgassan vegnir spargnads cleramain custs grazia a l'unificaziun sin plaun naziunal e grazia a l'access simplifitgà a las infurmaziuns d'acquisiziun dal maun public. Meglieraments da l'applitgabladad, da la clerezza e da la segirezza giuridica empermettan er in potenzial da spargn. Grazia al rinforz general da l'innovaziun, da la persistenza e da la concurrenza da la qualitad vegnan las IPM svizras ultra da quai a pudair far valair anc pli fitg lur fermezzas. En quest connex stoi vegnir remartgà che mo ina quota fitg pitschna (2018: ca. 2 %) da las incumbensas dal chantun Grischun va ad interpresas cun sedia a l'exteriur. Mesiras protecziunisticas u l'augment artifizial dals pretschs d'offerta sco ch'el vegn pretendì da singuls circuls n'èn betg cunvegnents e chaschunassan difficultads giuridicas sco er praticas tar la realisaziun.

La consultaziun dura dals 28 d'avrigl 2021 fin ils 28 da fanadur 2021. Ils documents da consultaziun pon vegnir consultads sin la pagina d'internet dal chantun Grischun. La tractativa dal project en il Cussegl grond è planisada per la sessiun da december 2021.


Infurmaziuns:
president da la Regenza dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch


Gremi: Chanzlia chantunala
Funtauna: rg Chanzlia chantunala

Neuer Artikel