Las pussaivladads da sa laschar vaccinar en il chantun vegnan extendidas grazia a las furniziuns da vaccins che vegnan spetgadas fin la fin da zercladur 2021. Ultra dals nov centers da vaccinaziun regiunals e dals posts da vaccinaziun "pop up" ch'èn disponibels mo durant in tschert temp, pon da nov er las medias ed ils medis da chasa porscher vaccinaziuns cunter corona. Las quantitads da vaccins limitadas vegnan priorisadas tenor il plan da vaccinaziun chantunal e sa drizzan a las pazientas ed als pazients respectivs da las medias e dals medis da chasa.

Fin la fin da zercladur 2021 vegnan spetgadas tut en tut var 90 000 dosas da vaccinaziun. Per pudair injectar questas quantitads uschè svelt sco pussaivel vegnan las vaccinaziuns purschidas a partir d'immediat er en 124 praticas da medias e da medis da chasa en tut il chantun. Quai sper ils centers da vaccinaziun regiunals ed ils posts da vaccinaziun "pop up" ch'èn disponibels mo durant in tschert temp. Questas praticas pon laschar furnir quantitads da vaccins limitadas e vegnan a priorisar quellas tenor il plan da vaccinaziun chantunal. Persunas cun grevas malsognas cronicas preexistentas sco er persunas da 75 onns e dapli han vinavant in access prioritar a la vaccinaziun.

Er ils centers da vaccinaziun vegnan a pudair augmentar lur capacitads durant las proximas emnas. Quai grazia al fatg ch'i vegnan furnidas pli grondas quantitads da vaccins. Perquai che las praticas da las medias e dals medis da chasa che sa participeschan a l'acziun da vaccinaziun disponan per entant mo d'in dumber limità da dosas da vaccinaziun, vegni scusseglià dad "inundar" questas praticas.

Evitar termins dubels
Tgi ch'è vegnì vaccinà da la media u dal medi da chasa, vegn supplitgà d'annullar eventuals termins u eventualas preannunzias tar ils centers da vaccinaziun. Quai per simplifitgar la planisaziun dals termins da vaccinaziun. Per evitar termins dubels (center da vaccinaziun / pratica da la media u dal medi da chasa) vegnan las persunas, che vulan sa laschar vaccinar, supplitgadas d'annullar lur annunzia tar il center da vaccinaziun sur la plattafurma da vaccinaziun, sch'ellas survegnan in termin tar la media u il medi da chasa. Quai è pussaivel directamain per SMS / per e-mail (ad impfung@amz.gr.ch) u sur la hotline (+41 81 254 16 00).

Fin ussa èn vegnidas injectadas en il Grischun passa 90 000 vaccinaziuns cunter corona. 35 000 da quellas èn segundas vaccinaziuns. Actualmain èn vaccinads var 80 pertschient da la populaziun grischuna dad 80 onns e dapli, 65 pertschient da las persunas da 70 onns e dapli sco er 35 pertschient da las persunas da 60 onns e dapli.

Las infurmaziuns davart las vaccinaziuns cunter corona vegnan cumplettadas cuntinuadamain sin la pagina d'internet www.gr.ch/vaccinar.

Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch

Gremi: Uffizi da sanadad
Funtauna: Chanzlia chantunala