Navigation

Inhaltsbereich

  • Erste Mitteilung
  • Neuen Beitrag einfügen

La Regenza ha garantì a la vischnanca d'Alvra ina contribuziun chantunala per planisar la dischlocaziun da Brinzauls. Ultra da quai ha ella deliberà in sustegn finanzial per il Reservat da biosfera da l'UNESCO Engiadina Val Müstair.

Contribuziun chantunala per planisar la dischlocaziun da Brinzauls

La Regenza ha garantì a la vischnanca d'Alvra ina contribuziun chantunala da maximalmain 459 000 francs per il project preliminar per planisar la dischlocaziun da Brinzauls. Ultra da quai ha ella prendì enconuschientscha dal concept da dischlocaziun correspundent da la vischnanca.

A Brinzauls en la vischnanca d'Alvra è en moviment ina bova d'ina gronda extensiun. Durant ils ultims 4 onns è la bova s'accelerada fermamain. Actualmain importa la sveltezza da la bova Vitg stgars 1,2 meters per onn. La part vest da la bova sa mova actualmain schizunt cun 1,6 meters per onn. Vitiers vegnan las grondas ratas da moviment da la bova Muntogna ch'èn medemamain s'augmentadas fitg ferm ils onns passads (fin a 7 meters per onn). Tras quai èn la fracziun Brinzauls sco er ils conturns pli vasts periclitads supplementarmain da grondas crudadas da crappa e da grippa. Actualmain vegn construida ina gallaria da sondagi che duai furnir infurmaziuns impurtantas davart las relaziuns dal grip stabil situà sut la bova Vitg sco er davart la massa glischnanta. En ina fasa posteriura duai la gallaria vegnir extendida ad ina gallaria da drenascha. Er suenter la terminaziun da questas retschertgas na vegni betg ad esser pussaivel da garantir ch'ina drenascha en la profunditad vegnia a franar en moda persistenta la bova Vitg.

Per quest motiv sa prepara la vischnanca d'Alvra – en il senn d'ina prevenziun – er per il scenari che la fracziun Brinzauls na dastga betg pli vegnir abitada, sche la bova Vitg s'accelerescha vinavant fermamain e/u sch'i pudess dar ina crudada dal grip. Perquai ha la vischnanca incumbensà il mars 2020 – en enclegientscha cun il chantun – l'interpresa Stauffer und Studach da Cuira cun l'elavuraziun d'in studi da planisaziun per il scenari d'ina dischlocaziun. Sa basond sin quest studi è vegnì elavurà il project preliminar per planisar la dischlocaziun.

Luftbild Brienz

La Regenza ha garantì a la vischnanca d'Alvra ina contribuziun chantunala da maximalmain 459 000 francs per il project preliminar per planisar la dischlocaziun da Brinzauls. 

Sustegn per il Reservat da biosfera da l'UNESCO Engiadina Val Müstair

La Regenza ha prendì enconuschientscha dal plan da management 2020–2024 per il Reservat da biosfera da l'UNESCO Engiadina Val Müstair (UBEVM) ed ha garantì ina contribuziun annuala da 150 000 francs per ils onns 2021 fin 2024.

Il Reservat da biosfera da l'UNESCO Engiadina Val Müstair (UBEVM) cumpiglia dapi l'onn 2017 il Parc naziunal svizzer (zona centrala), il Parc da natira Biosfera Val Müstair (zona da tgira e da svilup) ed ina part da la vischnanca da Scuol (zona da tgira). Il secretariat dal UBEVM realisescha mintga onn differents projects, tranter auter in project per sviluppar vinavant il Reservat da biosfera da l'UNESCO.

Foto UNESCO-Biosphärenreservat

©UNESCO Biosfera Engiadina Val Müstair

 

La Regenza ha prendì enconuschientscha dal plan da management 2020–2024 per il Reservat da biosfera da l'UNESCO Engiadina Val Müstair (UBEVM) ed ha garantì ina contribuziun annuala da 150 000 francs per ils onns 2021 fin 2024.

Neuer Artikel
Gremi: Regenza
Funtauna: rg Chanzlia chantunala dal Grischun