Navigation

Inhaltsbereich

Vaccinaziun cunter corona: avertura da las gruppas da vegliadetgna a partir dal 1. da zercladur 2021

  • Erste Mitteilung
  • Neuen Beitrag einfügen

En il chantun Grischun èn 39 317 persunas vegnidas vaccinadas duas giadas fin ussa. Perquai ch'ils vaccins èn disponibels en grondas quantitads, èsi pussaivel d'abolir la divisiun tenor gruppas da vegliadetgna. A partir dal 1. da zercladur 2021 vegnan ils termins da vaccinaziun attribuids entaifer la gruppa da las persunas da 16 fin 44 onns tenor l'entrada da las annunzias. S'annunziar per ina vaccinaziun è pussaivel da tut temp. Tut tgi che vul sa laschar vaccinar vegn supplitgà da s'annunziar ussa.

La priorisaziun tenor la vegliadetgna po vegnir abolida, perquai che la gronda part da las persunas annunziadas sur 45 onns ha survegnì ses termins da vaccinaziun fin a quest mument. La priorisaziun tenor gruppas da vegliadetgna aveva la finamira d'evitar grevs decurs da COVID-19. Las enconuschientschas dals ultims mais han mussà che la ristga da daventar grevamain malsauna è pli gronda, pli veglia ch'ina persuna è. Uschia han questas gruppas survegnì in access prioritar a la vaccinaziun.

Access prioritars èn er vinavant pussaivels
Ord vista da la prevenziun da la sanadad publica èsi giustificabel da reunir ussa las persunas pli giuvnas en ina gruppa da vaccinaziun. Las gruppas da vegliadetgna vegnan abolidas er, perquai ch'il dumber da persunas annunziadas en ils nov centers da vaccinaziun è different grond en las differentas gruppas da vaccinaziun.

Perquai ch'er las praticas da medias e medis da chasa èn involvidas en il fratemp en la campagna da vaccinaziun, è l'access a la vaccinaziun garantì a persunas cun malsognas cronicas. Sin basa dal rapport medical da lur pazientas e pazients giuditgeschan las medias ed ils medis da chasa il cas singul.

Tut tgi che vul sa laschar vaccinar vegn supplitgà da s'annunziar ussa per la vaccinaziun cunter corona. Las persunas da 50 onns e dapli survegnan vinavant in access prioritar a la vaccinaziun.

Grondas quantitads da vaccins
Premess che las dosas da vaccinaziun empermessas vegnian furnidas, vegn var 50 pertschient da tut la populaziun ad esser vaccinada cumplettamain fin mez fanadur 2021 (duas giadas u – sch'ins ha gì COVID-19 – ina giada). Vaccinaziuns en ils manaschis èn actualmain en planisaziun, na vegnan dentant betg ad esser pussaivlas avant mez avust 2021.

Fin ussa èn vegnidas injectadas en il Grischun passa 102 151 vaccinaziuns cunter corona. Actualmain èn 39 317 persunas vegnidas vaccinadas duas giadas. Sin la glista da spetga per in termin da vaccinaziun èn per il mument 24 101 persunas. Persunas che vulan sa laschar vaccinar e ch'èn gia s'annunziadas per in termin da vaccinaziun, na ston betg s'annunziar anc ina giada.

Evitar termins dubels
Tgi ch'è vegnì vaccinà da la media u dal medi da chasa, vegn supplitgà d'annullar eventuals termins u eventualas preannunzias tar ils centers da vaccinaziun. Quai per simplifitgar la planisaziun dals termins da vaccinaziun. Per evitar termins dubels (center da vaccinaziun / pratica da la media u dal medi da chasa) vegnan las persunas, che vulan sa laschar vaccinar, supplitgadas d'annullar lur annunzia tar il center da vaccinaziun sur la plattafurma da vaccinaziun, sch'ellas survegnan in termin tar la media u il medi da chasa. Quai è pussaivel directamain per SMS / per e-mail (ad impfung@amz.gr.ch) u sur la hotline (+41 81 254 16 00).

Las infurmaziuns davart las vaccinaziuns cunter corona vegnan cumplettadas cuntinuadamain sin la pagina d'internet www.gr.ch/vaccinar.


Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch


Gremi: Uffizi da sanadad
Funtauna: rg Uffizi da sanadad

Neuer Artikel