Navigation

Inhaltsbereich

Nagina obligaziun pli da purtar ina mascrina sin il stgalim secundar I

  • Erste Mitteilung
  • Neuen Beitrag einfügen

L'obligaziun per scolaras e scolars dal stgalim secundar I da purtar ina mascrina vegn abolida per ils 31 da matg 2021. La Regenza ha motivà sia decisiun tranter auter cun las experientschas positivas dals tests emnils en las scolas. Per las persunas creschidas vala l'obligaziun da purtar ina mascrina sin l'areal da scola (incl. locals d'instrucziun) dentant vinavant senza midadas. Er a las scolas medias dal Grischun vala vinavant l'obligaziun da purtar ina mascrina.

Cun ils tests che vegnan fatgs mintga emna en las scolas stat a disposiziun in instrument per identifitgar svelt ils cas da corona, per interrumper las chadainas da transmissiun e per reducir cumprovadamain las quotas d'infecziuns. La gronda maioritad dals resultats dals tests è stada negativa. L'obligaziun per scolaras e scolars da la 5. e 6. classa primara da purtar ina mascrina en las scolas ed instituziuns che sa participeschan als tests en las scolas aveva la Regenza gia abolì cun il conclus dals 6 d'avrigl 2021.

Vaccinaziuns procuran per distgargia
Grazia a las mesiras da protecziun e grazia als tests en las scolas han ins pudì mantegnair fin ussa l'instrucziun da preschientscha en las scolas dal Grischun. Ultra da quai è il svilup epidemiologic actual relativamain stabil en il Grischun. Grazia a l'augment da la rata da vaccinaziun tar las persunas sur 45 onns sa reducescha ultra da quai er la ristga da decurs da la malsogna gravants che capitan pli savens en questa gruppa da vegliadetgna che tar persunas pli giuvnas.


Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch


Gremi: Regenza
Funtauna: rg Departament d'educaziun, cultura e protecziun da l'ambient

Neuer Artikel