Actualmain ha tant la conferenza naziunala da las regenzas sco er ina conferenza regiunala in presidi grischun: il cusseglier guvernativ Christian Rathgeb presidiescha la Conferenza da las regenzas chantunalas (CdC), il cusseglier guvernativ Jon Domenic Parolini la Conferenza da las regenzas dals chantuns da la Svizra Orientala (CRO). Per questa chaschun istorica han els envidà las presidentas ed ils presidents da las partidas giuvnas naziunalas e da las partidas giuvnas da la Svizra Orientala ad in barat. Ultra da las discussiuns davart in federalissem modern han ils presidents da la CdC e da la CRO infurmà davart lur emprim onn d'uffizi.
En il chastè da Maiavilla han il president da la CdC Christian Rathgeb ed il president da la CRO Jon Domenic Parolini discutà oz suentermezdi cun ils presidis da las partidas giuvnas da la Svizra sco er cun ils presidis da las partidas giuvnas dals chantuns da la Svizra Orientala davart las sfidas futuras dal federalissem. En il focus è stada la dumonda, tge che la generaziun da las persunas sut 30 onns pensa davart in federalissem modern. Tuttas duas generaziuns politicas èn stadas dal medem avis ch'il federalissem creschì istoricamain en Svizra saja er en l'avegnir fitg impurtant. En la medema direcziun ha mussà in input da la politologa e perscrutadra Rahel Freiburghaus. Quest input ha cumplettà il barat en il chastè da Maiavilla en il rom d'in referat specific.
Dus presidis en mauns grischuns
Per l'emprima giada presidieschan dus represchentants dal chantun Grischun e da la Svizra rumantscha la CdC e la CRO. Sco unic chantun triling ha il Grischun – en questas conferenzas da las regenzas – ina funcziun da colliaziun impurtanta tranter las cuminanzas linguisticas e las differentas regiuns geograficas da la Svizra. Uschia promova il chantun Grischun sin plaun naziunal ed en la Svizra Orientala la chapientscha per la quarta lingua naziunala sco er per las relaziuns e per las sfidas spezialas dal Grischun sco chantun da muntogna.
Il cusseglier guvernativ Christian Rathgeb ha surpiglià il 1. da zercladur 2020 il presidi da la CdC. La CdC è la plattafurma la pli impurtanta per la collavuraziun da las regenzas en l'entira Svizra e per la furmaziun da l'opiniun politica tranter ils chantuns. Sur la CdC pon las 26 regenzas chantunalas far valair cun cleras finamiras ed en moda coordinada lur interess en la politica federala.
Il cusseglier guvernativ Jon Domenic Parolini è vegnì elegì ils 21 da mars 2020 a Tavau da la conferenza plenara da la CRO sco nov president da la CRO per la durada d'uffizi 2020 fin 2022. La CRO ha la finamira da far valair ils interess da la Svizra Orientala envers la Confederaziun ed envers auters chantuns per uschia sviluppar vinavant e rinforzar la Svizra Orientala.
Ils presidents tiran ina bilantscha positiva
Per lur emprim onn d'uffizi tiran ils presidents da la CdC e da la CRO ina bilantscha positiva, malgrà las grondas sfidas pervia da la pandemia da COVID-19. Uschia èn ils chantuns s'engaschads – sur la CdC e sur la CRO – cuminaivlamain ed activamain tar la Confederaziun per ils interess dals chantuns durant la pandemia ed han represchentà autras fatschentas impurtantas, sco il "NA" en la votaziun davart l'Iniziativa da limitaziun, cun success vers anen e vers anora.
Agiunta:
communicaziun a las medias da la Conferenza da las regenzas dals chantuns da la Svizra orientala (CRO)
communicaziun a las medias da la Conferenza da las regenzas chantunalas (CdC)
Fotografia agiuntada:
Il president da la CdC Christian Rathgeb ed il president da la CRO Jon Domenic Parolini cun represchentantas e represchentants da las partidas giuvnas e cun il secretari general da la CdC.
Infurmaziuns:
- cusseglier guvernativ dr. Christian Rathgeb, president da la Conferenza da las regenzas chantunalas, schef dal Departament da finanzas e vischnancas, tel. +41 81 257 32 01, e-mail Christian.Rathgeb@dfg.gr.ch
- cusseglier guvernativ dr. Jon Domenic Parolini, president da la Conferenza da las regenzas dals chantuns da la Svizra Orientala, schef dal Departament d'educaziun, cultura e protecziun da l'ambient, tel. +41 81 257 27 02, e-mail Jondomenic.Parolini@ekud.gr.ch
Gremi: Regenza
Funtauna: rg Chanzlia chantunala