Navigation

Inhaltsbereich

Communicaziun da la Regenza dals 3 da zercladur 2021

  • Erste Mitteilung
  • Neuen Beitrag einfügen
La Regenza ha dà glisch verda per la correcziun da l'acces da via "Miralago Sid" al Lago di Poschiavo. Ultra da quai ha ella approvà l'amplificaziun d'in sistem da preavertiment en Val S-charl.

Correcziun da l'access da via al Lago di Poschiavo

La Regenza ha approvà in project per curreger la via dal Bernina a l'access "Miralago Sid" al Lago di Poschiavo. Ils custs totals da quest project importan circa 3,6 milliuns francs. L'access da via na correspunda betg pli als standards actuals. El è memia stretg e chaschuna problems en cas da bler traffic e durant l'enviern. Ultra da quai è la surstructura da la via, che n'è betg resistenta a la schelira, en in nausch stadi.

En il rom dal project duai l'access "Miralago Sid", sin ina lunghezza da var 250 meters, vegnir construì tenor las normas. En connex cun il project èsi plinavant previs da construir in nov vial per sviar a sanestra e da schlargiar la punt "Miralago Sid". La punt che sparta da la via chantunala e che maina sur il Poschiavino tutga a la vischnanca da Brusio. Pervia da quai sto la vischnanca pajar ils custs dad 800 000 francs per schlargiar la punt. La punt serva sco via d'access a la deponia communala "Motta di Miralago" che duai vegnir engrondida en il rom d'in futur project communal.

Vorschaubild Korrektion Anschluss Miralago Süd Foto Brücke Miralago Süd

La Regenza ha approvà in project per curreger la via dal Bernina a l'access "Miralago Sid" al Lago di Poschiavo. Ils custs totals da quest project importan circa 3,6 milliuns francs.

Il sistem da preavertiment en Val S-charl vegn amplifitgà

La Regenza ha approvà il project "Sistem da preavertiment Val S-charl" da la vischnanca da Scuol ed ha ultra da quai concedì ina contribuziun chantunala da maximalmain 232 000 francs per la realisaziun. En il rom dal project duai vegnir amplifitgà il sistem da preavertiment existent per la protecziun cunter bovas, particularmain per minimar la ristga per las utilisadras ed ils utilisaders da la via (vehichels a motor e traffic betg motorisà). Da vegl ennà è la Val S-charl pertutgada da bovas. Sin in traject da var 4 kilometers han bovas sutterrà en spezial ils onns 2015 e 2017 per part dal tuttafatg la via d'avertura tranter Scuol e S-charl. La stad 2019 è alura vegnì installà in sistem da preavertiment che cumpiglia particularmain in avertiment da meteo e duas barrieras che ston vegnir serradas a maun da tuttas duas varts dal sectur da privel.

Cun il project qua avant maun duai ussa vegnir realisada en spezial in'automatisaziun da las barrieras che serran en cas d'alarm il traject da via periclità per las utilisadras ed ils utilisaders. Plinavant duain persunas vegnir avertidas a maun d'inslas da segirezza e da glischs d'avertiment entaifer il sectur da privel. Ultra da quai duain vegnir stgaffids lieus da refugi segirs. Ils custs totals dal project importan var 305 000 francs.

Foto Unwetter Val S-charl 2017

Vista sin la Val S-charl suenter las malauras da l'onn 2017. La via n'è betg pli visibla sut il mantun da glera.

La Regenza ha approvà il project "Sistem da preavertiment Val S-charl" da la vischnanca da Scuol ed ha ultra da quai concedì ina contribuziun chantunala da maximalmain 232 000 francs per la realisaziun.

La Regenza undrescha collavuraturas e collavuraturs da blers onns

A las collavuraturas ed als collavuraturs da l'administraziun chantunala cun 20, cun 30 e cun 40 onns da lavur surdat la Regenza tenor l'Ordinaziun dal persunal in regal sco renconuschientscha per lur collavuraziun da blers onns. Quest onn vegnan undrads tut en tut 149 collavuraturas e collavuraturs: 78 persunas cun 20 onns da lavur, 56 cun 30 onns da lavur e 15 cun 40 onns da lavur. Sco regals vegnan surdads bons da vin, bons da cliniez, bons da viadi u cartas da regal da GastroGrischun. Las collavuraturas ed ils collavuraturs da blers onns duain vegnir undrads en il rom d'ina festa. Pervia da la pandemia dal coronavirus decida la Regenza pir cur ch'igl è uschè lunsch, sche ed en tge furma che la festa po avair lieu quest onn.

Quest onn vegnan undrads tut en tut 149 collavuraturas e collavuraturs: 78 persunas cun 20 onns da lavur, 56 cun 30 onns da lavur e 15 cun 40 onns da lavur.

Projects da votaziun dals 26 da settember 2021

La Regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel dumengia, ils 26 da settember 2021:

- iniziativa federala dal pievel dals 2 d'avrigl 2019 "Distgargiar ils salaris, imponer taglias gistas sin il chapital" (Fegl uffizial federal 2021 5507);

- midada dals 18 da december 2020 dal Cudesch civil svizzer (lètg per tuts) (Fegl uffizial federal 2020 9913).

Sin plaun chantunal n'èn previs nagins projects da votaziun per ils 26 da settember 2021.

Sin plaun chantunal n'èn previs nagins projects da votaziun per ils 26 da settember 2021.

Neuer Artikel
Gremi: Regenza
Funtauna: rg Chanzlia chantunala dal Grischun