Navigation

Inhaltsbereich

Communicaziun da la Regenza dals 10 da zercladur 2021

  • Erste Mitteilung
  • Neuen Beitrag einfügen
La Regenza ha approvà in project d'exposiziun per curreger la via da Sursaissa en la vischnanca da Sursaissa Mundaun. Ultra da quai ha ella concedì contribuziuns per centers grischuns da trenament da sport.

Approvà la sanaziun e la correcziun da la via da Sursaissa

Entaifer l'abitadi da Flond è il vial da la via da Sursaissa en in nausch stadi. La surstructura da la via ha sfessas, crennas e sbassaments, uschia che la via n'ademplescha betg pli las pretensiuns envers la segirezza da manaschi. Il medem vala per ils dus mirs da sustegn: per part vesan ins schizunt lur fundaments. Per quests motivs ha la Regenza approvà in project per sanar e per curreger la via. Il project prevesa tranter auter er da schlargiar ils passapes, da transfurmar duas nischas da fermada dal bus sper la via tenor ils basegns da las persunas cun impediments sco er d'installar ina nova strivla melna. Sin giavisch da la vischnanca da Sursaissa Mundaun vegn plinavant construida a l'entrada vest dal vitg ina insla da separaziun che duai quietar il traffic. Ils custs totals importan circa 4 milliuns francs.

Foto Korrektion Obersaxerstrasse Mundaun

Entaifer l'abitadi da Flond è il vial da la via da Sursaissa en in nausch stadi. La surstructura da la via ha sfessas, crennas e sbassaments, uschia che la via n'ademplescha betg pli las pretensiuns envers la segirezza da manaschi.

Contribuziuns per ils centers da trenament grischuns

Ord la finanziaziun speziala Sport ha la Regenza concedì pliras contribuziuns a centers da trenament regiunals e naziunals che han lur sedia e che adempleschan lur activitad principala en il chantun Grischun. Ultra da quai ston ils centers da trenament pudair cumprovar in concept da juniors da la federaziun naziunala sco er ina contribuziun per la promoziun da juniors da Swiss olympic. Uschia conceda la Regenza a tut en tut 38 centers da trenament contribuziuns en l'autezza da circa 673 400 francs.

Foto Roland Arena
©Roland Arena

Ord la finanziaziun speziala Sport ha la Regenza concedì pliras contribuziuns a centers da trenament regiunals e naziunals. Uschia conceda la Regenza a tut en tut 38 centers da trenament contribuziuns en l'autezza da circa 673 400 francs.

Promover vinavant la vendita da muvel

Il sistem da pajaments directs da la politica agrara federala surlascha la tegnida d'animals – dapi la gronda refurma da l'onn 2014 – pli fitg a las reglas dal martgà liber, perquai ch'ils pajaments directs, che sa refereschan a l'animal, èn per gronda part crudads davent. La tegnida d'animals è tras quai vegnida pli e pli sut squitsch. La diminuziun spetgada oriundamain en la tegnida d'animals n'è dentant betg sa mussada signifitgantamain en il Grischun.

Sin dumonda da l'organisaziun per la promoziun da la vendita graubündenVIEH SA vegn la promoziun da la vendita e da la commerzialisaziun da muvel da niz e da maz en il Grischun concludida mintga onn da la Regenza. Ella fixescha differentas mesiras voluminusas e contribuziuns per activitads da reclama e garantescha mesiras che distgargian il martgà sco er autras facilitaziuns per las puras ed ils purs. D'ina vart vegn la graubündenVIEH SA indemnisada cun ina contribuziun da 40 respectivamain da 5 francs per animal per organisar e per realisar ils martgads publics d'arments, da nursas e da chauras da maz sco er cun ina contribuziun pauschala da 125 000 francs per manar ina structura da marketing professiunala e per realisar activitads da reclama. Da l'autra vart vegnan pajadas a las puras ed als purs contribuziuns da maximalmain 82 000 francs per promover la vendita da nursas e da chauras, e cun maximalmain 80 000 francs vegn sustegnì il servetsch da transport e da preschentaziun per promover ils martgads publics e per cumpensar las distanzas da transport ch'èn differentas tut tenor la regiun.

Sin dumonda da l'organisaziun per la promoziun da la vendita graubündenVIEH SA vegn la promoziun da la vendita e da la commerzialisaziun da muvel da niz e da maz en il Grischun concludida mintga onn da la Regenza.

Mess en vigur las revisiuns parzialas da la Lescha davart l'organisaziun giudiziala (LOG) e da la Lescha introductiva tar il Cudesch civil svizzer (LItCCS)

En la sessiun da favrer 2021 aveva il Cussegl grond concludì las revisiuns parzialas da la Lescha davart l'organisaziun giudiziala sco er da la Lescha introductiva tar il Cudesch civil svizzer. La revisiun parziala da la Lescha davart l'organisaziun giudiziala vegn messa en vigur per il 1. da fanadur 2021. La revisiun parziala da la Lescha introductiva tar il Cudesch civil svizzer vegn messa en vigur parzialmain per il 1. da schaner 2022.

Tras la revisiun parziala da la Lescha davart l'organisaziun giudiziala vegn stgaffida la pussaivladad da rinforzar temporarmain las dretgiras grischunas tras l'elecziun da derschadras e derschaders extraordinaris. Quai è d'ina vart il cas, sch'ina derschadra u in derschader n'è – durant plirs mais – previsiblamain betg en cas d'exequir ses uffizi pervia d'ina restricziun da la sanadad corporala, spiertala u psichica u per auters motivs. Da l'autra vart duain derschadras e derschaders extraordinaris pudair vegnir elegids, sch'ina dretgira n'è betg pli en cas da liquidar dispitas giuridicas pendentas entaifer in termin adequat u sch'igl è da temair ch'i resultia in tal stadi.

Tras la revisiun parziala da la Lescha introductiva tar il Cudesch civil svizzer vegn adattada la structura organisatorica da las autoritads per la protecziun d'uffants e da creschids (APUC). Igl è previs da concepir la APUC da nov sco in'unica autoritad chantunala cun filialas regiunalas. Cuntrari ad oz daventi uschia pussaivel da trair a niz sinergias en l'entir chantun.

La revisiun parziala da la Lescha davart l'organisaziun giudiziala vegn messa en vigur per il 1. da fanadur 2021. La revisiun parziala da la Lescha introductiva tar il Cudesch civil svizzer vegn messa en vigur parzialmain per il 1. da schaner 2022.

Neuer Artikel
Gremi: Regenza
Funtauna: rg Chanzlia chantunala dal Grischun